Кодшо кечылаште С.Г.Чавайн лӱмеш национальный лудмыверыште пеш оҥай интелектуал модыш эртен.
Тушко Марий Элыште илыше тӱрлӧ диаспор ден калыкле автономий-влакын еҥышт, посна командым ыштен, таҥасеныт. Чылаже шым команде лийын: марий, руш, татар, дагестан, армян, азербайджан, грузин, еврей, башкир.
А таҥасенытше тӱрло калык-влакын историйыштым, тӱвыраштым, сылнымутыштым, йӱлаштым палыме шотышто. Кум тур лийын: «Лӱмлӧ еҥ-влак», «Сылнымут да йылме», «Йӱла». Кажныштыже лу йодыш дене пуэденыт. Модышым Марий тӱвыра рӱдер вуйлатыше Наталья Пушкина вӱден. Йодыш-шамычымат тудак ямдылен.
Йодышыжо-шамычат куштылго лийын огытыл. Ныл командыже поснак кугу шинчымашым ончыктеныт. Пеҥгыдын каласаш лиеш, тӱнямбал кӱкшытан гран-прим «Двухглавый орел» команде сеҥен налын. Тушто тыгаяк лӱман мер организацийын еҥже-влак лийыныт.
Но ты мероприяийыште тӱҥжо сеҥымашат огыл ыле. Тӱрлӧ калыкын еҥышт пырля погыненыт да жапым пайдалын эртареныт. Икте-весе коклаштышт нунын кылышт тугакат сай. Ты шотышто Российысе марий-влакын федерал калыкле-тӱвыра автономийыштлан, Марий тӱвыра рӱдерын пашаеҥыштлан таум ыштыман. Пытартыш ийлаште ты организацийын да рӱдерын тыршымышт дене республикыште ятыр мероприятий нунылан эртаралтеш. Нине мероприятийлаште нуно вашлиялтыт, икте-весе нерген утларак пален, келшымаш кылышт пеҥгыдемеш. Тидыжым нунын тыгай мероприятийлаште вашлиймышт годымат умылет. Икте-весе дене сай палыме, лишыл еҥ семын саламлалтыт, мутланат, мыскарам ыштат.
Ты таҥасымаш-модышат чылт пайрем кас семын, веселан эртыш. Сеҥышышкыжат кӧ лектын, тунар тӱҥо огыл. Кеч организатор-влак нунылан кубко, диплом-влакым, пӧлекым ямдыленыт. Келшымаш шӱлыш озаланымыже утларак шерге. Эсогыл ик командышыже интернациональный лийын, тушко грузин, азербайджан, еврей-влак пырля ушненыт да модыныт.
С.Носова
Снимкыште: сеҥыше команде.
