20 ноябрьыште Г.Константинов лӱмеш академический руш драме театрыште Российысе да йот элласе руш театр-влакын «Мост дружбы» XVIII фестивальышт почылтын.
Тушко Российын 12 театрже ушнен.
– Кажне фестиваль мыланна да мемнан ончышына-влаклан пеш кӱлешан.Тушко Российысе театрла гыч эн сай коллектив-шамычым вашлияш моткоч куанле. Пандемийлан кӧра ӱмаште ятыр спектакльым онлайн йӧн дене ончыктенна, а ты гана чыла театр коллектив шке пашажым сценыш аклаш луктеш. Фестивальын репертуарже тӱрлӧ жанран да форман спектакль дене пойдаралтын. Тений кажне коллектив руш классике почеш шындыме постановкым ончыкта, – спектакль деч ончыч журналист-влаклан эртаралтше пресс-конференцийыште палемдыш руш драме театрын художественный вуйлатышыже Владислав Константинов.
Фестивальын кӱлешлыкше нерген эксперт-влакат палемдышт.
– «Мост дружбы» театр коллектив-влаклан кушкаш да репертуарым вияҥдаш полша. Икте-весын пашажым ужын, артист, режиссёр-шамыч мастарлыкыштым шуарат, – каласыш Махачкала гыч М.Горький лӱмеш руш драме театрын художественный вуйлатышыже Скандарбек Тупларов.
Тиде шонымашым эксперт Армине Оганесян шуйыш: «Фестиваль у коллективым, у лӱмым шочыкташ полша да тыге театр форумжат вияҥеш».
Чынжымак, кажне фестиваль ойыртемалтше.
Пресс-конференций деч вара «Ассамлам» ансамбль Дагестан калык тӱвыра дене палдарыш.
Фестивальым почмаште Марий Эл правительстве председательын икымше алмаштышыже Михаил Васютин, тӱвыра, савыктыш да калык паша шотышто министрын алмаштышыже Михаил Матвеев, Махачкала гыч Горький лӱмеш руш драме театрын художественный вуйлатышыже Скандарбек Тупларов да молат лийыныт.
Михаил Зиновьевич мероприятийыш погынышо-влакым пайрем дене саламлыш да республик вуйлатыше Александр Евстифеевын саламлымашыжым лудын пуыш.
– «Мост дружбы» фестиваль – усталык шӱлышан кугу площадке. Тудо артист ден режиссёр-влаклан тӱрлӧ коллективын мастарлыкшым ужаш, а ончышо-влаклан Российысе регион-влакын илыш ойыртемышт дене палыме лияш йӧным пуа. Режиссёр ден актёр-влакын кызытсе тукымыштын театр йӱлам арален толмышт моткоч куандара. Тиде поро пашаш тӱнямбал кӱкшытан форумат кугу надырым пышта. Мемнан республикын ик эн чапле сценыштыже Дагестан, Татарстан, Чечня, Башкортостан, Чуваший, Адыгей, Карелий, Моско да Марий Эл кундемла гыч коллектив-влакын мастарлыкым ончыктымышт регион-влак кокласе кылым пеҥгыдемдаш полша, – возымо серышыште.
– Тиде фестиваль, чынжымак, Йошкар-Олам Российын ятыр регионжо дене ушышо чапле кӱварлан шотлалтеш, – палемдыш Михаил Иванович да культур министерствын Тауштымашан серышыжым Скандарбек Тупларовлан кучыктыш.
– Марий Элын рӱдолашкыже кажне гана куанен толам, вет тыште мыйын моткоч шуко йолташем уло. Фестивальым мемнан театрлан почаш ӱшанымыланда – кугу чап, сандене изиш тургыжланена, но ӱшандам тӱрыс шукташ шонена, – каласыш Махачкала театрын художественный вуйлатышыже.
Фестивальым Махачкала театр «Смеётся ли Чехов…» комедий дене почо. Тудым зал тич чумыргышо калык шокшын вашлие. Тушто ӱдырамаш ден пӧръеҥ кокласе кыл нерген ойлалтеш.
Кокымшо кечын театрым йӧратыше-влаклан Озаҥ ола гыч «Сдвиг» камерный театр «Сердце Луиджи», Грозный гыч М.Ю.Лермонтов лӱмеш руш драме театр «Бэла» постановко-влакым ончыктен. А таче Башкортостан гыч Мустай Карим лӱмеш Национальный молодежь театрын «Капитанская дочка» спектакльже лиеш.
Ушештарена, фестиваль жапыште ончыкталтше спектакльлаш «Пушкин карт» дене пураш лиеш.
А.Байкова.
