Чолга гармонист, Россий культурын сулло пашаеҥже Арсений Яйцов Российын калык артистше, пародист Владимир Винокурым марла куштыктен.
В.Винокур Пародий театрын артистше-влак дене пырля кодшо тылзе мучаште Козьмодемьянск олаште Я.Эшпай лӱмеш калык тӱвыра рӱдерыште калыкым куандареныт, тӱрлӧ мыскара, пародий, муро да анекдот-влак дене воштылтареныт.
– «ВинокурШОУ-ш» лӱмынак мийышым. Ты гана Владимир Винокур дене кумшо гана вашлийым. Мероприятий деч вара сценыш кӱзышым да Россий артистлан 2000 ийыште «Аншлаг» компанийже дене «Бендериадыште» войзалтме фотокартычкым пӧлеклышым. 24 ий ончыч гармонь сем почеш кушталтымыжым оҥайын шарналтымыже кумылем нӧлтыш», – каласыш А.Яйцов.
Ты ганат уста марий гармоньчо сылне семжым шокталтен, а Россий шӱдыр йолташыже-влак дене пырля веселан тавалтен.
Алевтина БАЙКОВА
А.Денисовын фотожо
