«МАРИЙ ЭЛ» ТАЧЕ

Кечышот ден калык пале:

 

Марий йӱла почеш:

19.04 – Пел кон кече. Ямдылалтме, мушкылтмо, тоштыеҥым ӱжмӧ кече

20.04 – Кон кече, Тоштымарий кече, Кечыла вӱргече. Тоштыеҥым ушташ ямдылалтме кече

21.04 – Сорта чӱктыш кече. Тоштыеҥым уштымаш да ужатымаш

22.04 – Марий Кугече, Кугу кон кече. Пайремлымаш, юарлымаш кече

24.04 – Кугече рушарня. Юмо волымо кече. Шелык кумалтыш

Кумалтышын чинче тушыжо:

 «О, Порын толын шого, Кугече Кугу Юмо! Порсын лӱҥгалтышет дене нӧлтал илян-шамычын илыш кумылыштым. Ош Кече Аван йӱксыкашта лӱҥгалтышыж марте илыш кумылнам нолтен шого…»

 «Ош Кече Ава, каваште модын лекмет дене куандарен, илыш корнынам виктарен шогаш йодына. Илыш кумылна ош туара гай волгалт шогыжо. Илыш куатна ташлама пура гай нӧлталт шогыжо. Эр ӱжара гай мландым волгалтарен, тылзе гай кумылым нӧлтыктарен,  кенеж лай мардеж гай шыман мутланен, ший гай йымыжалтын, умыла гай оварген, порсын шӱртӧ гай шуйнен -ярымлалтын  илаш полшо, осал шоныш деч, кӱзӧ-товар-пычал деч кораҥде, шинчавочмо деч, осалым шонен коштшо деч, каргыше, шудалше деч арале…»

«Марла календарь»  гыч налме. Йошкар-Ола,2021 ий.

Черке йӱла почеш:

17-24 апрель Иисус Христосын орлыкым чытымыже нерген шарныме арня.

21  апрель – Кугу Изарня. Господьын кас кочкышым ышташ шолып погымыжым шарнымаш. Тиде кечын чыланат Святой Пырчесым (Причастийым) подылыт.

22 апрель – Кугу Кугарня. Господь Иисус Христосын утарыше святой орланымашыжым шарнымаш. Пӱтым пеҥгыдын кучымо кече.

23 апрель – Кугу Шуматкече.

24 апрель – Кугече! Иисус Христосын волгыдын Ылыж кынелмыже!

Эзотерик-влак темлат:

Пиалым лӱдыкташ огыл манын:

Уремыште мумо вургемым суртыш кондаш огеш кӱл;

Эҥыремышым пуштман огыл;

Шелше атышӧрым суртышто кучыман огыл;

Кочкын пытарыдыме шултышым ӱстембалне кодыман огыл;

Сурт гыч лектын кайыме деч ончыч нимом ургаш огеш кӱл.

Пайдале ой-каҥаш:

Лопшудо пакчаштыда уло гын, тудын пайдажым палаш уто огыл. Такшым тудо эм кушкыллан шотлалтеш. Тудын дене косметический средствылан шотлалтше лопшудо ӱйым ыштат. А лышташыжым гын, тыглай илышыштат кучылташ лиеш. Мутлан,  кукшо кечын пеледышым, укропым, петрушкым сад гыч пачерыш кондаш кӱлеш гын, ынышт кошко манын, лопшудо дене пӱтыралаш сай. Тыгак лопшудыш сырым, киндым пӱтыралаш лиеш (ончыч салфеткыш пыштыман), тунам нуно тыгак огыт кошко.

Садыште пашам ыштыме годым вуйым кече ынже пелте манын,  лопшудо лышташым вуйыш пӱтырен шындаш але упш семын упшалаш лиеш. Кечеш вачывалда когарген гын, коваштым лыпландараш тыгак тудын лышташыжым пышташ лиеш. Вуй корштымымат тыгай лышташ иземда. Корштышо йыжыҥлаат куштылгылыкым пуа.

А коршангыжым коля пошымо верыш пышташ лиеш. Кержалтше вуйжо коваштыш сайын пижеш, тидын денак тудо лӱдыкта. Коршаҥгын нӧшмыжым запорым эмлашат кучылтыт.

Шарнаш кодшо ой:

Шкендым ушанлан ужмет годым, весым орадылан ит шотло.

Шкендым шке ит мокто, колышт – кузе еҥ ойла.

А.Е.Китиковын «Марий калыкмут мутер» книгаж гыч налме.

С.Носова ямдылен

Опубликовать в Одноклассники

Добавить комментарий