1 май – Шошо пайрем; Кугече арня: кон кече, кечыла вӱргече.
2 май – Сорта чӱктыш.
5 май – Кугече.
Марий кумалтышын чинче тушыжо:
Туллан (Кече,волгенче) пелштыме мут:
«Тул водыж, Тул лава, тӱнялан, чыла чонанлан волгыдетым, шокшетым пӧлекле, мландынам, пӱртӱснам, суртнам ырыкте да арале. Шикшшет кужу, йылмет пӱсӧ, арале шем осал шӱлыш деч. Йоҥылыш ыштымемым, йоҥылыш ойлымемым, шонен шуктыде, осалым ыштымемым Ош Кугу Юмылан умылтарен пу, савырым ыштыже, пореш колтыжо».
ЭрВел Семонын (Новиковын) «Сандалык – Ош Кугу Юмо» книгаж гыч налме.
Черке йӱла почеш:
29 апрель – 4 май – Иисус Христосын орлыкым чытымыже нерген шарныме арня.
2 май – Кугу Изарня. Господьын кас кочкышым ышташ шолып погымыжым шарнымаш. Тиде кечын чыланат Святой Пырчесым (Причастийым) подылыт.
3 май – Кугу Кугарня. Господь Иисус Христосын утарыше святой орланымашыжым шарнымаш. Пӱтым пеҥгыдын кучымо кече.
5 май – Кугече.
Кугу тӱкан вольыкым аралышаш верч Орланыше Агафиялан молитва:
«О, шуко орланыше да кугу ушан великомученица Агафия! Тый чонет дене Пылпомышто Господь Юмын Престолжо ончылно шогет, тылат пуымо порылык дене мланде ӱмбалне тӱрлӧ чер деч паремдет; тыйын эн яндар тӱсет ончылно шогышо да кумалше, да тыйын полышетым йодшо-влакым чаманен ончал; мемнан нерген Господь Юмо деке шке святой молитват-влакым шукто да сулыкна-влакым касараш, черле-шамычлан паремаш, ойган да эҥгекыште улшо-влаклан вашке полышым йод; мыланна чылалан шке илышнам христианин семын мучашлаш да шке страшный судыштыжо поро вашмутым пуаш Господь Юмым сӧрвале да тый денет пырля чапландараш йӧршӧ лийына, Ачам, Эргым, да Святой Шӱлышым курым-курым мучкак. Аминь».
«Марла молитва-влак» книга гыч налме.2005 ий
Калык пале:
Май йӱрлан поян – сентябрьыште кукшо лиеш.
Тумо лышташ лекме годым игече эре гаяк йӱкшемда.
Пӱкшемрме пеледеш гын, тылетла мланде огеш кылме.
Май тӱҥалтыште куку мураш тӱҥалеш.
Куку ялыш толын мура – пожар лийын кертеш, ойленыт ожно.
Шарнаш кодшо ой:
«Айдеме шыде – тугеже тудо пиалдыме. Кажныже ты тӱнясе илышлан тудым пуа, мо дене чонжо темын. Тыгай еҥ-шамычлан ида сыре да ӱчымат ида ыште. Нуным илыш тугакшат огеш куандаре. Пиалан айдеме нигунам осал огеш лий!»
(Александрин Устрафеев)
Фен-шуй почеш:
Илышда тӱзланыже манын шонеда гын, эн ончыч йырым-йырдам эрыктыза, шотыш кондыза, чылажат шке верыштыже кийышаш. Уто вургемымат, ала иктаж-гана кӱлеш лиеш манын, поген аралаш нимолан. Тидыже сай энергийлан тендан илышыш, вуйушыш, шонымашыш пураш чаракым гына ышта, физический ден психологический состоянийдам луштара.
С.Носова ямдылен
Авторын фотожо
