ЙӰЛА

Кечышот ден калык пале:

Марий кумалтышын чинче тушыжо:
«Ош Кугу Юмо-Пӱрышӧ! Коштмаштат корнан ыштен, шонен лекмымат йӧнеш конден, неле пашалан куштылгылыкым пуэн, мийымаш-толмаште ыҥгайлыкым пуэн шого, тул-вӱд гыч лекташ, корнышто коштмаште осал тушман деч аралалташ пӱрен шого.
Мемнан туныктышо, эмлызе, шымлызе, тӱвырам нӧлтышӧ, сылнымут аланыште, казна пашам ыштыше еҥ-влаклан, зоотехник, агроном, ветврач, механик-влаклан тазалыкым, кужу ӱмырым, пиалым пӱрен шого, о Поро Пӱрышӧ! Кугыжалан, марий калыклан пӱрӧ мемнан ушан интеллегент-влакым жаплаш, нунылан полшаш!»
Марий сугынь» книга гыч налме, 2005 ий.
Черке йӱла почеш:
20 январь – Христосым Тынеш пуртышо Иоанн Пророкын погынжо.
22 январь –, Москвасе митрополит святитель Филиппын кечыже.
23 январь – Вышенскысе святитель Феофан Затворникын кечыже.
24 январь – Преподобный Феодосий Великийын кечыже.
25 январь – Святой орланыше Татианан кечыже. Сербийысе святитель Савван кечыже.
Йоча-влак верч молитва гыч:
«Чыла тӱрлӧ порылыкан Юмо! Тыйын порылыкетлан ӱшанен, нунын дене пырля Шучко судет ончылно шогалаш да лӱдде каласаш пу: «Теве мый да мыйын йочам, кудым мыланем пуэнат, Юмо! Да поро кумыл дене Тыйын каласен моштыдымо порылыкетым да курымаш йӧратымашетым моктен мурен, тыйын эн святой лӱметым чапландарем: Ачаным, Эргыным, Святой Шӱлышыным, курым-курым мучкак. Аминь».
«Марла молитва-влак» книга гыч налме (2005 ий).
Шотыш налаш уто огыл:
1.Ушыш иктаж-могай шонымаш толын, серен кодыза: иктаж гана кӱлеш лиеш.
2. Тендам ужалыше еҥ-влакым угыч илышышкыда ида пурто, еҥ-влак огыт вашталт.
3. Еҥын шонымашыжым нигунам ида мыскыле, шкендан ончыкылыкда нерген шоналтыза.
4. Эре чыным ойлыза, тунам тидым шарнен кодашат огеш кӱл.
5. Шке йоҥылыш улмыдам палыман.
6. Илышлан вуйым нигунам ида ший. Тиде нигӧланат оҥай огыл.
7. Мом ышташ огыда пале гын, малаш вочса. Весымат шарныза: «Тидат эрта».
8. Манеш-манешым ида шаркале, тиде нигунамат сайыш ок шукто.
9. Чот сыреда гынат, весым ида мыскыле., Жап шумеке, сӧраседа, а ойлымо кочо шомак эрелан ушеш кодеш.
Калык пале:
Январь кукшо да йӱштӧ – кеҥеж шокшо да йӱр деч посна лиеш.
Январьыште йӱштӧ шога – февральыште шуко поран лиеш.
Январьын кокымшо пелыштыже игече кечан – тений шурно лектыш сай лиеш.
Эрден эрак киса-влак вычыматат, йӱдым йӱштӧ толеш.
Тылзе йыр тӱтыра шога – поранан игечым вучыман.
Ӱмырым илен эртарышын каҥашыже:
«Нигунам еҥ-влаклан шке планда нерген ида каласкале, лучо шке сеҥымашда дене ӧрыктарыза».
«Таум ыштыза: тӱкылымӧ омсалан, автобусыш вараш кодмылан, шонымаш ышталтдымылан, икте-весе дене торлымылан – тугеже тиде тендан илышыште лийшашак огыл улмаш».
Лаштыкым Светлана Носова ямдылен
Снимкыште: Йошкар-Оласе Благовоещений собор ончылно
Авторын фотожо.

Опубликовать в Одноклассники

Добавить комментарий