19 январь – Вӱд модмо кече.
Марий кумалтышын чинче тушыжо:
«Ош Кугу Юмо-Пӱрышӧ! Чыла тыйын кидыштет. Шонымашнам виктарен шогаш, илышнам виктарен шогаш пӱрет манын кумалына. Мыланна ушым, тазалыкым пӱрет манын сӧрвален йодына.
Юмо-пӱрышӧ, марий калыкланна виян, волгыдо, весела, пиалан илыш корным пӱрет манын кумалына. Тыйын пӱрымашетым пагален, марий да моло калык верч тыршыметлан куанен таум каласена. Ончыкыжымат мемнам шӱм- чоным порылык илыш дене лыпландаре, пашам йӧраташ туныкто. Эргына, шешкына-шамычлан сай поро кумыл дене мужыр лийын илаш пӱрен пу. Мужыр кудыштышт сайын, таза поро кумыл дене, ваш колыштын, кугуракым пагален, ача-авам ончен, погым жаплен кучылтын, шочшан – эрган, ӱдыран – лийын илаш, элнам йӧратен, аралаш ямде лияш, Юмо Пӱрышӧ, пӱрен пу!»
«Марий сугынь» книга гыч налме, 2005 ий.
Черке йӱла почеш:
13 январь – Марий кундемысе священномученик Михаил Березинын кечыже.
14 январь – Господьлан пӱчмӧ йӱлам шуктымо кече, Святитель Василий Великийын кечыже.
15 январь – Преподобный Серафим Саровскийын мощыжым 2-шо гана мумо кече.
17 январь – 70 апостолын погынжо.
19 январь – Иисус Христосын Тынеш пурымо да Юмо Кончымо кече.
Йоча-влак верч молитва гыч:
«Чыла тӱрлӧ порылыкан Юмо! Йоча-влакым Шке порылыкет дене левед, Тыйын Суксет полшымо дене нуным тӱрлӧ эҥгек да осал корно гыч кораҥде. Шочшем верч куаныше авам ыште, илышыштем куаным кондышт да шоҥгылыкемлан эҥертыш лийышт».
«Марла молтива-влак» книга гыч налме (2005 ий).
Шотыш налаш уто огыл:
Вӱд – тиде водород ден кислородын варналтмышт: иктыже – 11%, весыже – 89 %.
Вӱдын ны тамже, ны пушыжо уке.
Тыглай вӱд белок, коя, углевод деч посна, сандене тушто нимыняр калорий уке.
Айдемын вӱрыштыжӧ 83 процентше – вӱд.
Кажне кечын вӱдым ситышын йӱаш гын, коваште ок шоҥгем, палемдат специалист-влак.
Мландывалне 1,1 процент вӱд гына йӱаш йӧршӧ, 97 процентше – тӱнямбал океанын, но шинчал шукылан кӧра эсогыл ялозанлыкыште кучылташ огеш йӧрӧ.
Шокшо вӱд йӱштӧ деч вашерак кылма.
Ӱмырым илен эртарышын каҥашыже:
«Кажне гана иктаж еҥлан тыглай полшен кертат гын, полшо да куане, тиде Юмо ала-кӧн кумалмыжым тыйын гоч шукта».
«Шып лийын моштымаш – шӧртньӧ, а кӱлмӧ жапыште шып лият – мунло улат».
Светлана Носова ямдылен
Авторын фотожо.
