Марий Эл вуйлатыше Юрий Зайцев Россий Федерацийыште региональный вияҥмаш шотышто правительственный комиссийын президиумжын заседанийышкыже ушнен. Заседанийым правительствын председательжын алмаштышыже Марат Хуснуллин вӱден.
Участник-влак Национальный благосостояний фондын (ФНБ) средстваже кӱшеш чоҥымо, реконструкций да инфраструктурым модернизироватлыме шотышто проект-влакын илышыш шыҥдаралтмышт нерген каҥашеныт. Марий Элым ончалаш гын, ФНБ деч налме окса дене Йошкар-Оласе шокшым пуышо «ТЭЦ-1» предприятийым уэмдаш палемдыме, акше – 240,4 млн. теҥге.
2022-2024 ийлан палемдыме национальный да федеральный проект-влакын кузе шукталтмышт шотышто Россий правительствын рейтингше почеш сӱрет тыгайрак: РФ субъект-влак коклаште Марий Эл корным ыштыме дене 2-шо, (11 октябрьлан), «Юлым тазаҥдымаш» федерал проект дене тыгак 2-шо (6 октябрьлан), а «Оласе средам йӧнаным ыштымаш» федерал проект дене 10-шо верлам (10 октябрьлан) налын шога.
Тений Марий Элыште 92 кумдыкым тӱзатыме паша шукталтеш, тидлан федеральный казна гыч 175,4 млн. теҥге окса ойыралтеш. Паша 91 кумдыкышто мучашлалтын, нунын кокла гыч 54-ше калык тӱшкан коштмо верлан шотлалтеш, 37 кудывече, кодшо иктыже – Изи Какшан серыште каныме вер.
Единый федеральный платформышто граждан-влакын онлайн-йӱклымашышт почеш 2023 ийыште тӱзатышаш кумдык-влакым ойырымо. Чылаже 77 кумдыкым тӱзаташ палемдыме, тышеч 29 кудывече да 48 тӱшка вер. Кызыт ты пашам шуктышаш подрядный организацийым ойырен налме да муниципальный контрактым пеҥгыдемдыме шотышто конкурс эртаралтеш.
Инфраструктур бюджет кредит (ИБК) кӱшеш 2022-2023 ийлаште Марий Элыште 3 проект илышыш шыҥдаралтшаш. Тиде: иктыже – Медведево посёлкысо Сеҥымашлан 75 ий бульварым ыштымаш, кокымшо – Медведево посёлкынак Черняков уремже Йошкар-Ола дене ушнымаште рекреационный кумдыкым чоҥымашын икымше этапше, нине пашам 2023 ий июньышто ыштен пытарышаш улыт; кумшо – Йошкар-Оласе аэропортышто пассажир терминалын проектшым ыштымаш да тудым чоҥымаш, 2024 ий 15 ноябрьлан ямде лийшаш.
РФ региональный вияҥмаш шотышто Правительственный комиссийын президиумжын заседанийжын протоколжо почеш, 2024-2025 ийлаште кок проектлан инфраструктур бюджет кредитым ойырымо шотышто йодмашым сайлан шотлымо. Медведево посёлкысо Черняков урем Йошкар-Ола дене ушнымаште рекреационный кумдыкым умбакыже ыштыме пашалан (2-шо этап) 472,3 млн. теҥге, а вес проект почеш 5 троллейбусым налаш 133,5 млн. теҥге ойыралтшаш.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
