Кече ший йолваж дене утыр да утыр мландым ырыкта, вуй ӱмбалне кайык-влакын сылне мурыштат чӱчкыдынрак йоҥга. Теве ик жап гыч лумат шулен йомеш, мланде топлана да сад-пакчазе-шамычын «шокшо» пагытышт тӱҥалеш. Тидлан кажне гаяк озавате ончылгоч ямдылалтеш – нӧшмым ӱден, росотам ямдыла.
Тидын шотышто Шернур районысо Тамшэҥер ялын шочшыжо, чапланыше тӱрызӧ Марий Элын калык мастарже Лидия ВЕТКИНА тыгерак ойлыш:
– Шере ден кочо пурысым 22 февральыштак, а помидорым, иктаж вич тӱрлӧ сортым, 6 да 12 мартыште ӱденам. Нуным ынде кусаренат шынденам. Пӧртыштӧ кажне пӧлемже волгыдо, садлан кажне окна янакыш вераҥденам. Эрдене кынелмеке, ончен лектам, сайын, пеҥгыдын кушкышт манын, пӧлемым южтарем, а вара, нунын дене мутланен-мутланен, вӱдым шавем, коклан ӱяҥдышымат пуаш ом мондо. А тудыжым шкеак ямдылем, вет ӱяҥдыш вуйым погаш полша. Мо оҥайже, южгунам росотам пакчаш луктын шындыме жаплан ме шере пурысым кочкашат тӱҥалына.
Кодшо кечылаште эше снегым ӱденам. Киярым апрельыште гына шындаш шонем.
Пеледышым моткоч йӧратем. Эустомым ик гана шынденам да пеш келшен, сандене ты ганат моторлыкшым ончен куанымем шуын. Тудым 11 январьыштак ӱденам. Тыгак эше пакчаштем калибрахоа, петуний, бархатцы, астра, вербена да эше шуко моло тӱрлӧ пеледыш кушкаш тӱҥалыт. Кызыт росоташтым ончен, йывыртен коштам.
Южгунам ӱдымӧ нӧшмӧ начарын лектеш, тений кеч-можат моткоч сайын, кажне пырчыже, шытен лектын. Тидлан кечышотым ончымемат лачеш лийын, шонем. Тудым «Сурт-пече» газетыште ужынам да ӧрдыжкырак кораҥден пыштенам. Йӧнан кече годым кеч-могай паша воранен кая маныт, сандене мыят тидым шотыш налаш тыршем.
А.БАЙКОВА
Д.Речкинын фотожо
