Тений республикнан рӱдолажлан 440 ий темеш. Йошкар-Олана ий гыч ийыш сылныштеш, у сыным налеш. Арам огыл тудын моторлыкшым ужаш Российын вес кундемлаж гыч турист-шамыч кажне кечын ятырын толыт.
Йошкар-Олаште ятыр пӧрт чоҥалтеш, у микрорайон-влак шочыт. Теве эше шукерте огыл Колясола ял (Мышино) воктене чара пасу лийын гын, кызыт тушто шуко пачашан пӧрт-влак нӧлталтыныт. Изи Какшан эҥер серыште «1-ше линий» микрорайон койын шарла.
Тошто оралте-влак олан рӱдыштыжӧ гына аралалт кодыныт, но нуныжымат жап дене келшышын уэмдат. Мутат уке, кужу жап чоҥалтше пӧрт-влакат улыт. Нуно олан сынжым огыт сылнештаре, но тидат — олан историйже. Тидын деч нигузе от шыл. Брюгге Набережный уремыште Марий кугыжаныш университетын оралтыже шинча. Ончыкыжым, чоҥен шуктымеке, тудо эҥер серлан ойыртемалтше тӱсым пуртышаш.
Кӱртньыгорно вокзал ваштареш верланыше скверат шукерте огыл уэмдалтын. Тушто асфальтым шареныт, теҥгыл-влакым вераҥденыт, тротуарыш плиткым оптеныт. А шкешотан памятник — паровоз — турист-влаклан пеш келша, Икманаш, Йошкар-Олаште эше ик каныме вер ешаралтын.
Медведево посёлко ден Йошкар-Ола уже ушненыт. Нуным корно знак гына ойырен шога. Теве Водопроводный ден Машиностроитель-влак урем ушнымаште кок у пӧртым нӧлтеныт. Йошкар-Оласе Йыван Кырлан уремже Колясола марте «миен шуын». А Черняков урем Мышино ден Машиностроитель урем-влакым ушен шуктен. Кызыт Черняков уремын икымше черетшым ыштен пытарыме гын, кокымшо ужашыже але чоҥалтеш гына. Тушто кызыт ятыр технике пашам ышта, чоҥышо-шамыч куткыла тыршат. Некрасов уремыште пу пӧрт-влак койыт, но лишыл жапыште, очыни, туштат шуко пачашан пӧрт-влак кушкаш тӱҥалыт.
Тачысе кечын застройщик-влак у илыме верым чоҥымаште жаплан келшыше материалым, у технологийым гына кучылтыт. Проект почеш у микрорайонлаште спорт да йоча модмо, каныме площадке-влакланат верым ойырымо. Икманаш, рӱдолана умбакыже кушкеш да сылнештеш.
М.СКОБЕЛЕВ,
Л.ШАБДАРОВА
М.Скобелевын фотожо