Шыжын лишеммыже кажне кечын чотрак шижалтеш. Куэ да моло пушеҥге укшлаште нарынче лышташ-влак койылалтат, пызлыште, поланвондышто, агытанораште йошкар саска чеверген кеча. Поснак пызлыгичке шке поян лектышыж дене куандара.
Шып сонарым йӧратыше-шамычланат тений пиалан пагыт толын. Пазарыш миен толат гын, кажне йолтошкалтышыште манме гаяку поҥгым ужалышым вашлият. Тыгодым икте ошпоҥгым, весе курезым ужала, кумшо – рыжыкым.
Сад-пакчазе-влакат кеҥеж мучко ончен куштымо пакчасаскаштым темлат. Кова-влакын ужалаш лукмо олмашт шӱвылвӱдымак луктеш, садышт гыч кондымо пеледыш аршашышт кумылым савыра. Шоҥгыеҥ-шамыч тыге торгайыме годым икте-весе дене шомакым вашталтат, чоныштым луштарат.
А поҥго тений чынжымак сайын шочын. Погаш гына ит ӧркане! Теве Йошкар-Ола пазарыште Сурок гыч ик поҥгызо дене мутнам вашталтышна.
– Мыняр илем, тынар поҥгым шукертак ужын омыл. Ме кажне ийын родем-влак дене чодыраш саскам, поҥгым погаш коштына. Мом шекланенам: ала-молан високосный ийлаште ошпоҥго шуко шочеш. 2020 ийыштат тыгак лийын. Теният тыгак. Пазарыште тӱрлӧ поҥгым ужалат: пундыштӱҥвоҥгым, тыгак куэлӱвалым, рыжыкым, рывыжвоҥгым, ош курезым. Мый ошпоҥгым веле темлем. Но ты поҥгыжат тӱрлӧ лиеш: ош тӱсанже пушкыдо, а шемалгыже пеҥгыдырак. Мый гын кокымшыжым погем. Мемнан пӱнчан кундемыште тудо ятырак кушкеш, – каласыш поҥгызо Юрий.
Тыге мутланымына годым йырна налше-влак погынаш тӱҥальыч. Огыда ӱшане, векат, но кутырымо гутлаште палымына чыла поҥгыжым ужален пытарыш. Тугеже кидна куштылго улмаш, шоналтышна семынна.
Пазар дене умбаке ошкылна, прилавкыште могай гына саска уке. Шинча шалана веле. Кажныжым налын тамлыме шуэш. Содыки кеҥеж мучаш — шыже тӱҥалтыш саскалан поян. Поснак тений. Тау тылат, Пӱртӱс ава!
Михаил СКОБЕЛЕВ,
Лидия ШАБДАРОВА
М.Скобелевын фотожо.
