Кодшо шуматкечын, 2 ноябрьыште, Марий Эл Республикын да Калык-влакын икоян улмо кечышт вашеш Йошкар-Оласе «Мари» сийгудышто республикыште илыше тӱрлӧ калык шке куштымашыжым ончыктен.
Тыгай мастер-классым Российысе марий-влакын Калыкле-тӱвыра федерал автономийыштын советшым вуйлатыше Лариса Яковлева ден Йошкар-Олаште илыше тӱрлӧ калыкын НКА-штын чолга еҥышт организоватленыт. Поснак аджар калыкын «Гандагана», грузин калыкын «Мтиулури» куштымашышт мероприятийыш погынышо-шамычын кумылыштым савырышт. Ты кок куштымашым Екатерина ден Софья Цкитинидземыт ончыктышт. Вара Мусаниф Моллачиев авар калыкын лезгинке куштымашыж нерген каласкален, шкежак тудым кушталтен ончыктен.
– Кавказ калыкын куштымашыштыже ӱдыр ден каче кидыштым огыт кучо. Тидыже ислам йӱла дене кылдалтын.Ӱдыр йӱксӧ гай койшаш, кидшым кайык шулдыр семын шаралтышаш, рвезе писе лийшаш, куштымаш годым арслан гай койшаш. Дагестаныште илыше калык-влакын куштымашышт тӱрлӧ, кажныже ойыртемалтше. Тыгак йылме ойыртемат уло. Курык коклаште илыше-шамыч ик семын мутланат гын, лоп верыште илыше – вес семын, – умылтарыш Мусаниф Моллачиев, тыгодым шкежат кушталтыш. Мастер-класс годым чылаштым Азербайджан гыч Мустафа Мамедов ӧрыктарен. Тудо Муслим Магомаевын «Синяя вечность» мурыжым устан йоҥгалтарен, а мероприятийыш погынышо-влак тудым шулен колыштыныт. Тудак вара пианино дене азербайджан семым шоктен пуыш. А мучашлан Советский район «Эр ӱжара» калык ансамбль ятыр марий куштымашым ончыктыш, такмак-влакым йоҥгалтарыш. Тыге мастер-классыш погынышо-шамыч абхаз, азербайджан, дагестан, еврей, марий, руш, татар калык-влакын куштымашышт дене палыме лийыныт.
Михаил СКОБЕЛЕВ,
Лидия ШАБДАРОВА
М.Скобелевын фотожо
