ПЕНСИЙ

Пенсий фонд увертара: Ийготат кӱлешан

Пенсийыш лекме ийготым кӱзыктымӧ нерген чарныде ойлат гынат, Российыште тудо эше ончычсак кодын: ӱдырамашлан – 55 ий, пӧръеҥлан – 60 ий. Палемдыме нине ийготыш шушо айдеме 2018 ийлан 13,8 пенсий баллым да 9 ий паша стажым поген гын, сулен налме канышыш лекшашлан документым погаш тӱҥалын кертеш. Но илыш ончыкта: пенсийыш лекше-влак кокла гыч пелыже наре умбакыжат пашам ыштат. Лачшымак нуно, пенсийым шке жапыштыже огыт оформитле гын, ончыкыжым тудым палынак кугемден кертыт. Пашам йӧратыше тыгай еҥ-влакым кугыжаныш кумылаҥда, руш манмыла, поощрятла. Пенсийым палемдышашлан 55 але 60 деч варашрак йодын толмо кажне ийлан страховой пенсий ден тудлан келшыше выплатым премий сынан келшен толшо коэфициентлан кӱзыктат.

Мутлан, ӱдырамаш 55 ияш огыл, а 60 ияш пенсийым палемдаш йодын толеш гын, страховой пенсийжын премиальный коэфициентше 1,45, а палемдыме выплатыжын 1,36 лиеш. Икманаш, пенсийже иктаж 40 процентлан кугемеш. Сулен налме канышыш лекме жап деч 10 ий вара толшо еҥын страховой пенсийже 2,32 пачаш кӱза, выплатын коэфициентше – 2,11 пачаш.

М.ИВАНОВА.

Опубликовать в Одноклассники

Добавить комментарий