Марий Элыште 16 школым капитально олмыкташ тӱҥалыныт.
Тиде пашалан «Молодёжь да йоча-влак» нацпроект почеш ойырымо окса дене тунемме верлаште леведышым, кабинетлам, спорт ден актовый зал-влакым, кочмыверым, каныме да школ воктенысе кумдыкым уэмдаш, тыгак у мебель ден кызытсе оборудованийым налаш палемдыме.
«Палем, капитально олмыктымо дене кылдалтше йодыш шуко ача-авам, йочам да туныктышым тургыжландара. Мый декем вияш линий годым ты шотышто йодмаш-шамыч пуреныт. Ий еда икмыняр школым уэмдаш тыршена. Йоча-влакын тунемме пагытышт ынже кӱрылт манын, нуным жаплан вес школаште тунемаш йӧным ыштена. Олмыктымо паша кокла шот дене налмаште 6-8 тылзе шуйна. Тений 1 сентябрьлан школ-влак йоча-шамычым вашлияш ямде лийшаш улыт», – возен тг-каналысе лаштыкыштыже Марий Элым вуйлатыше Юрий Зайцев.
Палашда, 2022 ий гыч республикысе 247 школ гыч 34-ым капитально олмыктымо.
Г.Кожевникова
Фотом Марий Элым вуйлатыше Юрий Зайцевын тг-каналысе лаштыкше гыч налме.
