УВЕР ЙОГЫН

Калыкын кумылжым шотыш налыт

Эртыше изарнян Звенигово илем-влак кокласе библиотекыште проектный сессий эртен. Звенигово ола ден Провой кундемым вуйлатыше-шамыч дене вашлиймашке 48 еҥ толын.

Пырляште нуно Звенигово ола кумдыкысо Юл серын моторлыкшо да ситыдымашыж нерген мутланеныт. Калык серын кечывалвел ужашыжым да тудын пеленысе кумдыкым тÿзатыме шотышто шонымашыжым луктын ойлен. Чыла темлымашым шотыш налме. Нуным лишыл жапыште обработатлат да отчётыш пуртат, вара архитектор-влаклан конкурслык проектым ямдылымышт годым негызлан налаш пуат.    

3 апрель марте Звениговышто калык деч ола нерген йодыштмаш эрта: Юл серын кечывалвел ужашыштыже кумдыкым тÿзатыме проект лачшымак оласе-влакын вашмутышт дене кылдалтше лиеш.

М.ИВАНОВА  

Опубликовать в Одноклассники

Добавить комментарий