Маристатын Гражданский состояний акт-влакым возымо единый кугыжаныш реестрын данныйжым иктешлымыж почеш, тений январь-июльышто Марий Элыште 3674 аза шочын. Ты чот гыч 1520 йоча Йошкар-Олаште ош тӱняш толын, 264 – Волжскышто, 98 – Козьмодемьянскыште.
Муниципальный район-влак коклаште аза шочмо чот дене икымше верыш Медведево район лектын (тушто 474 йоча ош тӱняш толын), кокымшыш – Звенигово район (201 аза), кумшыш – Морко район (185 икшыве).
Тений январь-июльышто Марий Элыште 6106 еҥ ош тӱня гыч каен. Колымо шот дене эн кугу коэфициентым (1000 еҥлан шотлымаште 25,7 промилле) Юрино районышто регистрироватлыме, вара – Курыкмарий (22,6 промилле) ден Параньга (20,5 промилле) районлаште.
Статистике почеш, республикыштына тений 7 тылзе жапыште калыкын чотшо 2432 еҥлан иземын.
Ӱмашсе тыгаяк пагыт дене таҥастарымаште тений январь-июльышто 32,2 процентлан шукырак еш шочын, 100-лан шотлымаште 83 мужыр ойырлен, 2020 ийыште 87 еш шаланен.
М.ИВАНОВА
