Шочмо калыкнан эртен толмо корныжым, тӱвыра ден йӱлажым, поян ойпогыжым арален кодаш да ончыкыжымат нуным вияҥден колташ, йоча-влакым шымлыме пашашке кумылаҥдаш кӱлмӧ амал дене республикысе Калык усталык да культур ден каныме паша шотышто шанче-методике рӱдер йоча да самырык-влаклан «Кугезе вож» фольклор фестивальым эртара.
Тудо кодшо курымын 90-ше ийлаштыже тӱҥалтышым налын да кум ийлан ик гана усталык шӱлышан, талантан икшыве ден коллектив-шамычым ик верыш чумыра. Ты ганат фестиваль 28 февральыште Оршанке посёлкысо тӱвыра ден каныме рӱдерыште эртен. Тушко республикнан индеш районжо да Йошкар-Ола гыч 150 утла участник погынен.
Пайремым почмаште Калык усталык рӱдер вуйлатышын сомылжым шуктышо Александр Луничкин, Оршанке район администраций вуйлатыше Александр Плотников лийыныт.
– Ме чыланат кумда Российыште тӱрлӧ йылме дене мутланыше калык дене, келшен илена, садланак ме виян улына. Кажне калыкын – шке вожшо, тудым ме йӧратышаш, аралышаш улына. Нылле ий ончыч республикыш илаш куснымеке, марий калыкын тӱвыраже, йӱлаж нерген кумданрак пален налмеке, моткоч йывыртенам да ынде шкемымат марийлан шотлем, – палемден Александр Леонидович.
– Кеч-могай калык шке вожшо дене виян. Мемнан республикыштат кушкын толшо тукымын кугезе вожым шымлымыже куандара да кугешнаш тарата, – каласен Александр Николаевич.
Фестивальлан йоча-влак тӱрлӧ пайрем да йӱла, калык муро, куштымаш да семӱзгар сем дене кылдалтше программым, шымлыме пашам ямдыленыт…
Репортажым умбакыже 3 мартыште лекше «Марий Эл» газетыште лудаш лиеш
А.БАЙКОВА
Авторын да И.Речкинын фотошт