«Воштылаш, товатат, сулык огыл!» фестиваль-конкурсым «Кугарня» газет редакций 1992 ий годсек эртара. Ты ганат тудо 1 апрельыште В.И.Ленин лӱмеш тӱвыра полатыш калыкым чумырен.
Ончычсо семын зал чылт «ташленжак» огыл ыле, но калыкын тӱрлӧ район гыч лӱмынак ончаш толмышт куандарен.
Участник-влак Волжский, Морко, Советский, Параньга, У Торъял, Медведево, Шернур, Кужэҥер районла да Йошкар-Ола гыч лийыныт. Мыскараче-шамыч тӱрлӧ темым тарваташ тыршеныт, но кугу сценылан чыланжак ямдылалт шуктеныт манаш ок лий. Калык Морко район гыч толшо кок коллектившымат сайын вашлие. Тат-Чодыраял тӱвыра пӧрт гыч Айсылу Хамидуллина, Фирдания Хамидуллина да Альфия Гарапшина (снимкыште) «Доктор дене приёмышто» мыскарашт дене икымше верым сеҥен налыныт. Татар ӱдырамаш-влакын марла яндырын (татарлат, рушлат мутланышт) да артист семын нимыняр вожылде модмышт жюрилан поснак келшен. А Морко калык театр ты гана кокымшо вер дене палемдалтын. Тудо «П» буквам гына кучылтын «Поссовет председательын приёмныйыштыжо» сценкым модын ончыктен. Мыскарам Анна Якушева возен да режиссёр семынат шкежак тыршен. Кокымшо верыш тыгак У Торъял районын шочшыжо-влак Игорь Попов ден Адам Мамаев логалыныт. Тиде жанрыштат самырык вий улмылан куанена.
Советский район Кужмарий гыч Вера Мочаева ден Валентина Ефремова мыскара шӱлышан фестивальым ик ганат коден огытыл, очыни. Ты гана нуно «Семон кайыш» мыскарам ончыктеныт, кумшо верыш лектыныт.
Волжский район Сотнур тӱвыра пӧртын пашаеҥже-влакын мыскара сценкыштым жюри посна приз дене палемден. Нунылан уста кидмастар Виталий Кудрявцев дечат пӧлек лийын.
«Мыскараче мурызо» конкурсышкат икмынярын ушненыт. Нунын кокла гыч Медведево районысо Нужъял тӱвыра пӧрт пеленысе «Ошла сем» ансамбль сеҥышыш лектын.
– Воштылчык кечын мыскараче-влакым фестивальыш чумырымо шкешотан йӱлаш савырнен ыле, но пандемийлан кӧра кок ий эртарыме огыл, – каласыш фестивальын организаторжо, «Кугарня» газет» кугыжаныш предприятийын директоржо Эдуард Иманаев. – Калык вучен, шкеат йокрокланенна. Конкурс нерген увертарымеке, участник-влак ончыч шагалрак лийыныт, вара ешаралтыч.
Чынжымак, мыскара сынан пайремым калык вучымо шижалтеш, но пайрем кумылым тӱнясе пуламыр изиш волтен манаш лиеш.
А.Байкова
И.Речкинын фотожо
