Калык йӱлам аралыше фестиваль
28 ноябрьыште Йошкар-Оласе 32-шо №—ан школышто Еш идалыклан пӧлеклалтше Еш йӱла дене палдарыше калык кокласе фестиваль эртен. Тушко ятыр уна толын.
– Российыште 197 тӱрлӧ калык уло, а Марий Элыште – 59 наре. Чыланат ме ик кугу пӧртыштӧ, Российыште, илена. А шочмо изи элнаже – Марий Эл. Ме икте-весын йӱлажым пагалена, икте-весе деч тунемына. Тӱрлӧ калыкын еш йӱлаж дене палдарыше фестиваль тидым раш ончыкта, – каласен Российысе марий-влакын калыкле-тӱвыра федерал автономийыштын советыштым вуйлатыше, Кугыжаныш Погын вуйлатышын икымше алмаштышыже Лариса Яковлева фестивальым почмо годым.
– Кажне школын шке йӱлаже уло, ӱшанена, тиде фестиваль школнан йӱлашкыже пурен шуэш. Тачысе мероприятийыш азербайджан, армян, еврей, марий, руш, татар, таджик, узбек калык диаспорын чолга еҥышт, СВО-н участникше, туныктышо-шамыч, верысе казак-влакын чолга еҥышт Денис Коломиец, НКА-н еҥже-шамыч толыныт, – палемден школ директор, Кугыжаныш Погынын депутатше Наталья Пушкина.
Сценыште шке мастарлыкыштым «Падыраш» фольклор марий йоча ансамбль (вуйлатыше – Эльвира Петрова), «Булгар» татар ансамбль, «Чаваш Ен» чуваш ансамбль ончыктен. Азербайджан калык мурым Зита ден Ясмин Нуруллаевмыт ден Диана Петрова муреныт. Кавказ калыкын куштымо студийжын «Аманат» ансамбльже, «Узоры» руш ансамбль (вуйлатыше – Ангелина Речкина) мероприятийым сӧрастареныт. Концертым Марий Элын калык артисткыже Ирина Ефремова мучашлен. Тудын почеш чыланат кидым кучен муреныт. Тыге еш йӱла фестиваль поро шарнымашым коден. Тек тудын ӱмыржӧ кужу лиеш.
Михаил СКОБЕЛЕВ,
Лидия ШАБДАРОВА
М.Скобелевын фотожо
