Эртыше кечылаште республик вуйлатышын пашажым жаплан шуктышо А.Евстифеев Сарын, пашан, Вооружённый Вийын, правам аралыше орган-шамычын ветеранышт ушемын пленумыштыжо лийын.
Кугурак ийготан-влак дене вашлиймаш Россий Федерацийын Кугыжаныш флагшын кечыжым палемдыме дене келшен толын. Тушто эн тӱҥ йодыш семын кушкын толшо тукымым элым йӧратыме шӱлышеш воспитатлыме паша шотлалтын.
Йоча ден самырык тукымым патриотически воспитатлыме шотышто ветеран-влакын сай пашаштым палемдыш.
– Тыланда пеш кугу тау. Ӱмырда мучко Российын, республикын чапышт верч тыршенда да тачат чолга улыда. Тиде йодыш моткоч кӱлешан. Ме обществылан могай еҥым ончен куштена, тугай элыште илаш тӱҥалына. Тиде – мемнан, Российын ончыкылыкшо, тудын ончыкыжо экономически да культурно кузе вияҥмыже, – мане Александр Александрович.
Тудо тыгак верысе йӱлан пеҥгыдеммыж нерген палемдыш. Ямдылыме выставкат шонен лукмо огыл. Экспонат-влак самырык тукымлан сай пример семын улыт. Портретысе герой-влакат республикыште илыше, регионым вияҥдымашке шагал огыл надырым пыштыше улыт.
Самырык тукымым элым йӧратыме шӱлышеш ончен куштымылан кугыжанышат кугу тӱткышым ойыра. Евстифеев Россий президент В.Путинын ойлымыжымат ушештарыш:
– Тичмаш налмаште самырык тукымым патриотически воспитатлымаште кызыт лач келшыше жап. Мутлан, мемнан армий йӧршеш у кӱкшытыш нӧлталтын. Службат кугешнымашым лукташ лийше манын палемден.
Вашлиймаште ветеран-влакын обществе верч тургыжланымыштым, нунын тӱрлӧ проектыште, тӱшка мероприятийыште чолган участвоватлымыштым, тукым гыч тукымыш куснышо йӱлам арален кодаш полшымыштым палемдыш да ты пашашт умбакыжат шуйныжо манын сугыньлыш.
Е.Эшкинина.
