Йошкар-Олаште Самырык-влакын полатыштышт кызытсе жапыште тӱвыра-влак кокласе диалог нерген лекций эртен.
Тудым полатын пашаеҥже-влак Российысе «Знание» обществе дене пырля эртареныт. Спикер Россий Федераций Президент пеленысе Калык озанлык да кугыжаныш службо академийын доцентше Мария Широ лийын.
Шанчызе Россий шуко национальностян кугыжаныш, тиде тудын ойыртемже манын палемден, тыгак кызытсе жапыште тӱрлӧ калык коклаште диалогым ышташ кӱлмым каласкален, цифровизацийлан тӱткышым ойырен. Тудын мутшо почеш,онлайн-коммуникаций тӱнян тӱрлӧ луклаж гыч еҥ-влаклан мутланаш полша, тыгодым шинчаваш ончен мутланыме йӧн йомеш манын.




