Волжский районысо Учимсола ялыште илыше фермер Андрей Пушкинын озанлыкшым шукертак ончалаш шонен коштынам. Тидлан амалжат икте веле огыл лийын.
Иктаж кум-ныл ий ончыч республикнан ик эн виян бизнесъеҥже, марий изданийын журналистше улмем пален налмекше, ала-мо нерген изишак шоналтыш да пеҥгыдын мане:
– Юлсер кундем гыч улат. Андрей Пушкиным палет? Пеш чапле фермер озанлыкым чумырен. Пашамат кызытсе жаплан келшышын, у технологийым шыҥдарен виктара. Верысе калыклан пашам пуа, пашадарымат удан огыл тÿла. Газетышкыда тыгай айдеме нерген возаш кÿлеш!
Тиде фермер нерген калык дечат шуко поро мутым колынам.
– Андрей Пушкинын озанлыкыштыже ик гана веле огыл лийынам, кажне ганажат чыла пашам моштен виктарымыжым куанен онченам. Моткоч пашаче, проста да поро айдеме. Да нуно ешге тыгай улыт! Тургым годым калыкым машинаж дене ял еда поген коштеш, кастене мöҥгеш наҥгаен кода. Кечываллан тутло кочкышым чылт яра пукша, пашадарымат сайын тÿла. Йöра, кундемыштына тыгай фермер уло, – Курыклÿвал ялыште илыше Лариса Сергеева ик гана веле огыл ойлен.
А.Пушкинын фермер озанлыкше нерген материалым газетнан шушаш номерыштыже лудса.
Маргарита ИВАНОВА
Авторын фотожо
