Марий Элым вуйлатыше Юрий Зайцев йоча тӧнеж-влаклан шым автобусым налаш 29 миллион теҥгем ойыраш пунчалым луктын. Тылеч посна идалык мучаш марте эше 10 миллион теҥгем социальный тӧнеж-влакым модернизироватлаш да нунын материально-технический базыштым вияҥдаш колтат – тидыже кужу жап ончымо системым ыштыме шотышто пилотный проектым илышыш сайынрак пурташ кӱлеш.
Тидын нерген Ю.Зайцев таче Калык-влакын келшымаш пӧртыштышт эртыше Марий Эл Республикын социальный пашаеҥже-влакын съездыштышт ойлен.
Россий Федераций президентын указше дене келшышын, элыштына 8 июньышто Социальный пашаеҥын кечыже палемдалтеш, манын республикым вуйлатыше да конференц-залыште шинчыше чыла еҥым профессиональный пайрем дене саламлен.
Ю.Зайцев нунын пашаштышт шуко шӧрыным: еш, ӱдырамаш да йоча-влакым, илалше ийготан граждан ден инвалид-шамычым социально аралымым, калыкым социально обслуживатлымым, инвалид-влакым реабилитироватлымым, пашадымылык да паша миграций дене кылдалтше йодышлам рашемдымым – палемден,
«Пагалыме йолташ-влак! Тений республикнан чыла муниципальный образованийжым авалтыше кужу жап ончымо системым илышыш пуртымо пашам иктешлыме шот дене регионнан Россий Федерацийын Паша да социальный аралымаш министерствыж велым кӱкшӧ акым налмыжлан чылаландат тауштем. Кызытсе илышыште беженец, специальный военный операцийын участникше-влак да нунын ешышт дене ыштыме пашадан кӱлешлыкшым палемдыде ом керт. Вашталташ лийдыме пашадам кӱкшын аклем да пагалем!» – манын Марий Элым вуйлатыше съездын участникше-шамычлан.
Ю.Зайцевын палдарымыж гыч, тений социальный тӧнеж-влакын материально-технический базыштым пеҥгыдемдаш да модернизироватлаш регионын бюджетше гыч 53 миллион теҥгем ойыраш палемдыме. Тылеч посна йоча тӧнеж-шамычлан шым автобусым налаш 29 миллион теҥгем да кужу жап ончымо системым ыштыме шотышто пилотный проектым илышыш пурташ 10 миллион теҥгем колташ пунчалме.
Социальный пашаеҥ-влакын пашашт кӱкшӧ профессионализмым, тӱткышым, порылыкым да йӧратымашым йодеш, палемден Ю.Зайцев да чылалан тазалык ден сеҥымашым тыланен, а вара награде-шамычым кучыктен.
Пашам кужу жап да тыршен ыштымылан Марий Эл Республик правительствын Чап кагазше дене палемдалтыныт: Волжский районышто калыкым социально обслуживатлыме комплексный рӱдерын социальный пашаеҥже Елена Абрамова, У Торъял районысо Какшанмучаш (Пектубаево) интернат-пӧртын кугурак медицине сестраже Эльвира Кленова, Юрино районышто калыкым социально обслуживатлыме комплексный рӱдерын тӱҥ бухгалтерже Людмила Павлова.
Марий Эл Республикым вуйлатышын Таумутшым Звенигово районысо Красногорский интернат-пӧртын ончымо шотышто полышкалышыже Галина Борисовалан, Волжский районышто калыклан социальный полыш мере-влакым ыштыме рӱдерын пӧлка начальникше Елена Жарковалан, Курыкмарий районышто калыкым социально обслуживатлыме комплексный рӱдерын социальный пашаеҥже Анна Матюковалан, Звенигово районышто калыклан социальный полыш мере-влакым ыштыме рӱдерын тӱҥ специалистше Наталья Шмагиналан увертарыме.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
