Марий Элым вуйлатыше Юрий Зайцев Правительствын заседанийжым эртарен.
Каҥашыме тӱҥ теме – «Илышлан кӱлешан инфраструктур» нацпроект кышкарыште «Оласе кумдыкым йӧнаным ыштымаш» федеральный проект шумлык.
«Ме гражданна-влакын илышыштым саемдыме шотышто пашам умбакыже шуена. Тӱзатыме программе мер кумдыкым уэмдаш полша, тылеч посна калыклан мо кӱлмым да темлымашым шотыш налын, еҥ-влак дене кылна пеҥгыдемдалтеш» – палемден Юрий Зайцев.
Республикын Чоҥымаш, архитектур, илыме вер да коммунальный озанлык министерствыжым вуйлатыше Александр Горбунов палемден: 2025 гыч 2030 ий марте республикыште 252 кудывече да мер кумдыкым тӱзаташ тӱҥалыт. 2027 ий марте 595,3 миллион теҥгем ойырат. Тышеч 541,4 миллион теҥгеже федеральный бюджет гыч, 5,4 – республикын бюджетше гыч, муниципал образований-влакын бюджетышт гыч 45,8 миллион теҥге моло источник гыч – 2,7 миллион теҥге.
2025 ийыште 216,9 млн. теҥгелан 54 кумдык тӱзатыме лиеш: 10 кудывече да 44 мер кумдык. Кызытеш 52 объектше шотышто ойпидышым ыштыме, латкумытыштыжо пашам тӱҥалме.
Ушештарена: Козьмодемьянскыште, Звениговышто да Волжскышто тений оласе кумдыкым йӧнаным ыштымаш всероссийский конкурсышто сеҥышыш лекше кум проект илышыш пурталтеш. Тидлан 234,4 млн. теҥгем ойырымо.
Марий Элыште 2026 ийыште тӱзатышаш мер кумдыкым ойырен налме шотышто всероссийский йӱклымашлан ямдылалташ тӱҥалме. Тудо 21 апрель гыч 12 июнь марте zagorodsreda.gosuslugi.ru ик федеральный палтформышто эрта. Проектыш Йошкар-Ола, Волжск, Козьмодемьянск, Звенигово да Медведево ушнат. Тушто илыше-влак деч 125 темлымаш пурен. Йӱклаш 51 мер кумдыкым ойырен налме.
Цифр
29 – Йошкар-Олаште
7 – Волжскышто
8 – Козьмодемьянскыште
4 – Звениговышто
3 – Медведевыште
Марий Эл вуйлатышын пресс-службыжын уверже негызеш Евгений Садовин ямдылен.
Денис Речкинын фотожо/ Марий Эл вуйлатышын пресс-службыжо
