Йылме да цифр
Марий кугыжаныш университетыште «Российысе калык-влакын йылмыштым цифраҥдымаш: опытым кумдаҥдымаш да ончыкылык» тӱнямбал кӱкшытан VI научно-практический конференций эрта.
Мероприятийын генеральный партнёржо – «Яндекс» компаний. Конференций улшо опыт дене пайлалташ, йылмым цифраҥдыме дене кылдалтше йодышым каҥашаш, ончыл технологийым кучылтын, йылме-влакым арален кодаш да Российысе калык-влакын поянлыкыштым цифр йӧн полшымо дене шаркалаш эртаралтеш.
Марий Эл вуйлатыше Юрий Зайцевын лӱмжӧ дене конференцийын участникше-влакым республикын правительстве председательжын алмаштышыже – тӱвыра, савыктыш да калык-влакын пашашт шотышто министр Константин Иванов саламлен.
2024 ийыште регион вуйлатыше да Марий Кугыжаныш университет «Яндекс» дене пырля пашам ыштыме нерген ойпидышым подписатленыт. Тиде документ дене келшышын, республикыште туныктымо проект-влак вияҥшаш улыт, компанийын сервислаштыже марий шомакым умылен моштымо кумдаҥшаш, моло пашат виктаралтшаш.
Конференций нерген кумданрак газетнан лишыл номерыштыже лудын кертыда.
Марий Эл вуйлатышын пресс-службыжын уверже негызеш Лидия Шабдарова ямдылен.
Денис Речкинын фотожо.
