15 сентябрьыште республикын рӱдолаштыже Йошкар-Олалан Россий Федерацийын «Паша чап ола» лӱмым пуымылан пӧлеклалтше торжественный мероприятий лийын.
Мероприятийым регион вуйлатыше Юрий Зайцев почын.
– Йошкар-Олаште илыше-влакым «Паша чап ола» чаплӱмым пуымо дене саламлем!
5 сентябрьыште Российын Президентше Владимир Владимирович Путин олалан тиде почетан лӱмым пуымо нерген указым подписатлен.
Эл вуйлатыше палемден: исторический чынлыкым арален кодымаште тӱҥжӧ – ончычсо тукым-влакын подвигышт. А сеҥыше-шамычын койыш-шоктышыштым мемнан йочана ден уныкана-влак налшаш улыт.
Тиде темлымаште посна рольым «Единый Россий» партий модын. Тудо тыгай чаплӱмым пуымым тӱҥалтыш гычак сайлан шотла да герой-влакым курымешлан шарнымашеш кодымашке ушна.
Эше ик мемнан предприятийын – Марий машиностроений заводын – паша коллективше Александр Невскийын Орденже дене палемдалтын.
Кугу Отечественный сар жапыште республикын рӱдолаже пеҥгыде тыл лийын. Тыште ончыкылык Сеҥымаш тапталтын.
Ме герой-влаклан тауштена да, кӧ ты кече марте илен шуын, нунын ончылно вуйнам савена.
Таче передовойышто улшо боецна-шамыч да республикыште илыше-влак, ик тыл лийын, тиде кӱкшӧ лӱмым пеҥгыдемдат, – каласен Юрий Зайцев.
Мероприятийыште тыгак Федераций Советын сенаторжо Константин Косачев саламлен.
Кугыжаныш Погын председатель Михаил Васютин, погынышо-влакым саламлышыжла, тиде событийын пӱтынь республиклан кӱлешан улмыжым палемден. Тудо ойлен: тиде лӱм – кугу сеҥымашке Марий Элыште илыше-влакын надырым пыштымыштым пӱтынь элын аклымашым да неле пагытыште тылыште шке вийым, тазалыкым, илышым чаманыде сеҥымашым таптыше-влакым пагалымашым ончыкта.
Любовь Камалетдинова
