Марий Элын тӱвыраж дене Ростов Великий оласе кремльыште палдарат.
«Ростовысо кремль» тоштер-заповедникыште «Российын калыкше-влак. Кугу еш – тӱшка историй» кугу ончер почылтын.
Проектыш Т.Евсеев лӱмеш национальный тоштер ушнен. Тудын фондшо гыч Марий кундемыште илыше калык-влакын ойыртемалтше тӱвырашт, йӱлашт дене палдарыше экспонат-влакым – илышыште кучылтмо арверым, калык вургемым, тӱрлӧ кидпашам – Ростов Великий олаш колтеныт.
Проект Россий калык-влакын икоян улмо идалыклан пӧлеклалтын да элысе тоштер-влакын собранийышт гыч 200 наре экспонатым чумырен. 2025 ийыште тудын икымше этапше лачшымак Йошкар-Олаште эртен.
«Марий Эл – моткоч шкешотан кундем. Тыште курымла дене ваш келшен 50 тӱрлӧ калык ила. Тыгай тӱрлӧ улмына дене кугешнена да тыгодым чыланнам пырля ушышо йӧратыме шочмо элнан моло семынак ужашыже улмынам умылена», – палемден Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ончерын организаторжо ден тудым почмашке толшо уна-шамычлан. Ончер 5 сентябрь марте пашам ышташ тӱҥалеш.
Светлана Носова
