Ончер
Михаил Скобелев,Лидия Шабдарова
Йомакысе тӱняш логалат
5 апрельыште Йошкар-Олаште, Национальный сӱретсымыктыш галерейыште, Сергей Федонинын «Поволжский треугольник» арт-проектше почылтын.
Галерейыште Юл кундемысе сӱретче ден фотограф-влакын пашаштым гына огыл, тыгак Российын вес кундемлаж гыч лекше мастар-шамычын произведенийыштымат чумырымо. Арт-проект ятыр ий эрта, тиде жапыште икмыняр у лӱм палыме лийын. Мутлан, Сергей Чиликов, Иван Михайлов, Юрий Притиск.
Залыш пурымеке, йомакысе тӱняш логалмыла чучеш. Тушто тӱрлӧ суксым, янлыкым, ӧрыктарыше, но тыгодымак палыдыме чонан-влакым ужаш лиеш. Ончерым шерын лекмеке, скульптор ден сӱретче-шамычын пашаштышт у йогын лекме шижалте. Тидыже Ирина Ладейщикова ден Анастасия Токмолаеван палдырныме коеш. А Никита Решта скульптурлаштыже акрет жапысе чонан-влакым ончыкта.
Фотограф-шамыч ты гана пашаштым серийлаш чумыреныт. Тидыже нунын ойырымо темыштым сайрак почын ьнчыкташ полшен. Анна Кондюкован «Ясонька, голубонька» фотопашаже драме да сюжет могырым ойыртемалтеш. Щёлково ола гыч Владимир Жерновенковын фотожо-шамычат ӧрыктарат. Тудын «30 лет тишины» серийже моткоч шып верыш «наҥгая». Тушко айдемын йолжат тошкалын огыл, манаш лиеш.
Чебоксар гыч фотограф Юрий Притиск тошто пагытым шарныктарыше фотола гыч фотоколлажым чумырен. Тудын коллажше-шамыч мемнам эртыше жапыш пӧртылтат. Мутлан, Граждан але Кугу Отечественный сарыште лийше-влакын чурийыштым. Нуно ӱмбакына пуйто вес тӱня гыч ончат.
Ончер эртыме жапыште фотограф ден оператор-влак тӱрлӧ мастер-классым эртарат. Тыгак музыкант, композитор-шамыч дене вашлиймаш-влак лийыт. Икманаш, тыгай оҥай ончерым ужде ида код.
Михаил Скобелевын фотожо.
