Марий Эл вуйлатыше Юрий Зайцев граждан-влаклан приёмым эртарен. Толшо-влакын йодышышт утларакше корным да оралте леведышым олмыктымо дене кылдалтыныт.
Йошкар-Ола гыч Наталья Лебедева Ширяйково микрорайонысо К.Цеткин уремын кудывечылаштыже корно шӱкшӱлан вуйым шийын ойлен. Тыште школ, йочасад верланеныт, а кудал пурымо корным шукертак олмыктымо огыл.
Марий Эл вуйлатыше кудывече кумдыкым 30 август марте шотыш пурташ кӱштен.
Советский район гыч Манефа Вершининан каласкалымыж почеш, Алексеевский тӱвыра пӧртын леведышыже гоч йӱр вита, тыге костюм, апппатур-влак локтылалтыт. Тиде оралтыштак книгагудо верланен. Телым моткочак йӱштӧ. М.Вершинина леведышым олмыкташ да посна котельныйым ышташ полышым йодын.
Вуйлатыше оралте леведышым октябрь марте олмыкташ шӱден. Тылеч посна Ю.Зайцевын порученийже почеш шокшым пуымо жаплан тӱвыра пӧртым газ дене ырыкташ тӱҥалмашке куснат, тидыже темепературым шонымо семын келыштараш, адакшым коммунал услугылан тӱлымӧ акым шулдештараш йӧным пуа.
Килемар посёлкышто илыше Тамара Черепанова шӱгарла корным ачалаш йодын. Корнын кутышыжо – 860 метр, моткоч локтылалтше, муниципальный образованийын казнаштыже олмыкташ ситыше окса уке.
Корным олмыкташ субсдий республикын бюджетше гыч ойыралтеш, увертарен Марий Эл вуйлатыше. Пашам тений октябрь мучаш марте ыштен шуктат.
Марий Эл вуйлатышын администрацийжын пресс-службыжын уверже негызеш Л.СЕМЕНОВА ямдылен
Д.Речкинын фотожо / Марий Эл вуйлатышын пресс-службыжо
