Марий Элыште 12 гыч 17 ияш йоча-влакым у коронавирус инфекций деч 27 январь гыч вакцинироватлаш тÿҥалме.
Подростко-шамычлан COVID-19 деч «Гам-КОВИД-Вак М» (вес семынже «Спутник М») вакцинын 480 комплектшым кондымо. Тудым республикысе поликлиникылашке шеледен колтымо. Кок компонентан вакцине «Спутник V» гаяк, дозировкыжым гына вич пачаш иземдыме.
Йошкар-Олаште подростко-шамычым 1-ше №-ан поликлиникын восстановительный эмлымаш отделенийжын (Комсомольский урем, 123-шо №-ан пöрт) 20-шо кабинетыштыже кажне паша кечын 10 гыч 12 шагат марте вакцинироватлат.
Прививкым шындыме деч ончыч йочан тазалыкшым врач терга.
Ушештарена: 15 ияш марте йоча-влаклан прививкым ача-аван але закон дене пеҥгыдемдыме еҥын келшымыж почеш веле ыштат.
М.ИВАНОВА
