15-25 июльышто Татарстанысе Алабога олаште тӱнямбал кӱкшытан арт-симпозиум эртен.
Тушко Россий, Беларусь, Китай да Турций гыч сӱретче-влак ушненыт.
– Мероприятийыште Российын латныл субъектше да латиндеш олаж гыч участник-влак лийыныт. Нунын коклаште самырык чия мастар-влак дене пырля Россий искусствын сулло деятельже, сӱретчыже да Татарстан Республикын калык художникше-влакат лийыныт. Тыгай арт-симпозиумышто кумшо гана лийынам, – каласкала самырык сӱретче, Российысе сӱретче-влак ушемын Марий Элысе пӧлкажым вуйлатыше Анна Санникова. – Мероприятий Еш идалыклан пӧлеклалтын. Тенийысе вашлиймашна «Долгое долгое детство» теме дене эртен, садлан лу кечыште йоча пагыт дене кылдалтше сӱретым ямдыленна. Тыгак тӱрлӧ мастер-классыште мастарлыкым шуараш йӧн лийын. Мутлан, Башкортостанын сулло сӱретчыже Салават Мухаметович Гилязетдинов ден Россий художник ушемын еҥже Азамат Салаватович Гилязетдинов «шокшо» эмаль дене сӱретлаш, а Турций гыч профессор Ахмет Хикмет Бурутчугиль эбру кагазыш ксилографийым ышташ туныктеныт. Турций гычак искусствовед Исмаил Эрдоган дене пырля «йыргешке» ӱстел йыр погынен мутланымашат оҥайын эртен.
Мероприятийын пытартыш кечынже Тачысе этноискусство тоштерыште «Долгое долгое детство» выставкым почыныт. Тушко арт симпозиумыш мийыше сӱретче-влакын пашаштым чумыреныт. Анна Санникован ямдылыме кок радынажат тусо экспозицийым пойдараш полша.
– Ик пашамым «Ошма замокын корольжо» манын лӱмденам. Йоча годым вакшышыш шартыш, кӱпчык дене замокым ыштен, рыцарь, король, принцессе лийын модмо да шонен лукмо шучко герой дене кредалме ушыш чӱчкыдынак пура. Мутат уке, сӱретыште шонымашым изишак вашталтыме. Ошма гыч чоҥымо замок моткоч писын шалана, вет мемнан ньога жапысе шарнымашнат, фантазийнат тыгаяк. Садлан нуным аралаш кӱлеш. Но нине фантазий, шарнымашлан кӧра ме пиалан йоча пагытым, тӱнян вестӱрлӧ улмыжым, чудылан ӱшанымым чоныштына аралена, – ешарыш самырык сӱретче.
А.Байкова
Фотом А.Санникован альбомжо гыч налме
