УВЕР ЙОГЫН

Йоча – илышын пеледышыже

Йоча – илышын пеледышыже
Марий Эл Республикыште илыше пагалыме еҥ-влак!
Тендам Йоча-влакым аралыме тӱнямбал кече дене саламлем!
Йоча пагыт – кажне еҥын илышыштыже ойыртемалтше, тӱрлӧ оҥай событийлан поян, шуко уым пален налме куанле жап.
Лач йоча улмо годым айдеме личность семын шуаралтеш, ончыкылык корно рашемеш, койыш-шоктыш негызлалтеш. Ача-аван, воспитатель ден туныктышо-влакын полшен шогымыштлан кӧра шке вийлан ӱшан пеҥгыдемеш, тидыже илышыште шке верым мумаште да йол ӱмбак чоткыдын шогалмаште пеш кӱлешан.
Ешын, обществын да кугыжанышын задачышт – кушкын толшо тукымлан вияҥашыже кӱлшӧ условийым ыштымаш, йоча-влаклан тунемаш, спорт да творчество дене заниматлаш, канаш, иктаҥаш-влак дене мутланаш, сеҥымашке шуаш, у кӱкшытыш нӧлталташ йӧным ыштымаш. Йоча-влак – мемнан ончыкылыкна, тудын могай лийшашыже лач мемнан дене, кугыеҥ-влак дене, пеш чак кылдалтеш.
Школыш коштшо йоча-влак кокла гыч шукыштын каникул тӱҥалын, тиде – эн пиалан жап. Каникул жапыште кечан игечылан куанен каналтен кошташ, йӱштылаш, йолташ-влак дене, урок нерген шонкалыде, веселан мутланаш лиеш. Тек кеҥеж тылзе-влак оҥай событийлан, вашлиймашлан да мероприятийлан поян лийыт да кужу жаплан ушеш кодыт.
Тиде чапле кечын чыла еҥлан: йоча-влакланат, кугыеҥ-шамычланат – пиалым, тазалыкым да илышыште сай деч сайым гына тыланем. Тек лишыл еҥ-влак шӱм-чон шокшышт да тыршен шогымышт дене тендам ырыктат, тек чыла шонымыда шукталтеш!
Марий Эл Республикым Вуйлатыше Ю.В.Зайцев

Опубликовать в Одноклассники

Добавить комментарий