19 январь – Вӱд модмо кече. Крешене пайремым шукын вучат. Ты кечын, йӱштым ончыде, кумылан-влак эҥерыште але ерыште йӱштылаш келыштарыме верыш чывылалташ пурат але пелен налме атыш вӱдым темен налын мӧҥгышкышт кондат. Ю шӱлышан вӱд погынышо нелылыкым мушкын колта, капкылым куштылемда, маныт.
Йолташ-влак, Крешене кечым кузе эртареда? Вӱдым налын кодеда мо? Иктаж гана йӱштӧ вӱдыш пуренда?
Кристина ЛЕБЕДЕВА, М.Шкетан лӱмеш Марий национальный драме театрын актрисыже:
– Крешеньылан ик ганат иян вӱдыш пурен омыл, йӱштӧ, шонем. Вӱдым налаш черкыш миен толаш тыршем. А икмыняр ий ончыч пелашем дене Ежовысо монастырьынлан шотлалтше памашыш миенна, тудо освятитлыме вӱдыштӧ чывылалт лектын гын, мый кидым, шӱргым шӱялтенам.
Надежда ИБАШЕВА-ШАРАБУЕВА, Марий самырык театрын акртисыже:
– Крешеньылан ик ганат йӱштылаш пурен омыл. А вӱдым кажне ийын налына: олаште черкыште, а ялыште – таве гыч. Юмынвӱд ден пӧрткӧргым эрыктена, капкылым шӱалтена. Мо оҥайже, Крешене йӱдлан ялыште тавым почмым кодат. Тыгак малаш вочмо деч ончыч омса ден окна ӱмбаке ыресым ыштен каят.
Станилав УСТЮГОВ, мурызо:
– Крешене кечын иян вӱдыш ик ганат пурен омыл – йӱштыс! Садлан чывылалташ кайыше-влакым кажне гана ӧрын ончем.
Иван ЗЕМЦОВ, Тӱвыра, савыктыш да калык-влакын пашашт шотышто министерствын вӱдышӧ специалист-экспертше:
– Крешеньым кажне ийын ешыште палемдена, вет мемнан икшывына-влак православный гимназийыште тунемыт. Пайрем кечын моло семын вӱд вакыш огына пуро, вӱдым оньыкувам конда. Тудо – черкыш коштшо, юмылан ӱшаныше.
Мемнан ешыште вес йӱла илышыш пурен: ме кажне ийын китай У ийым пайремлена. Тидлан лӱмынак ананасым да 108 апельсиным омсалондем гыч пачерышкына кудалтена. Кажне фруктыш шонымашнам каласена. Апельсиным кок арня жапыште, пачер гыч лукде, мӧҥгыштак веле кочман але унала толшо-влаклан темлаш лиеш. Мутат уке, тыгай йӱла нерген кажныжын шке шонымашыже лектеш, но тынар фруктым кочмат арам огеш лий, тазалыкым пеҥгыдемда, чер деч арала.
Евгений ИВАНОВ, самырык мурызо:
– Крешеньым моткоч вучем. Тиде кечын йолташ-влак дене купельыш кажне ийын йӱштылаш коштына. Кум кече йӱштылаш лиеш, маныт, садлан ӱмаште кум кече почела чывылалтынна. Йӱштырак игечыште чотрак келша, тыге вӱдын йӱштыжым от шиж. Адакшым мый йӱштӧ деч ом лӱд, кажне монча кечын лумышто пӧрдалам, тиде мылам моткоч келша, арам огыл телым шочынам.
Эн тӱҥжӧ – Крешеньылан эре черкыш кошташ тыршем, вӱдым налам. Тудым идалык мучко эркын-эркын йӱам, поснак – черланыме годым.
А.БАЙКОВА.
Фотом интернет гыч налме
