Игече йӱкшемдымеке, кажне суртоза шке семынже телылан ямдылалтеш. Мутлан, ялыште илыше-влак пӧртйымал омсам петырат, шокшемдат; пуым шелын, артанаш оптат. Оласе пачерыште илыше-влакат олмыктымо пашам шуктат…
Йолташ-влак, телылан кузе ямдылалтыда? Пуым ятыр ямдыленда, пӧртым шокшемденда?
Анатолий МАРТЫНОВ, Звенигово район Юлъял тӱвыра пӧрт вуйлатыше:
– Кызыт илыш пеш сай. Тений мемнан ялыш газ толын шуын, садлан ынде коҥгаш олташ огеш кӱл.
Пуым кодшо ийыште ямдылыме, эше ятыр кодын. Мончаш олташ сита. Пӧрт окна, пӧртйымал омса – чыла пластик гыч, сандене шокшемдаш огешат кӱл. Телылан пакчасаска гыч шапашым шуко ямдылыме. Нине банкыламат пӧртйымаке волтымо.
Любовь МАКАРОВА, «Пӧлек» фольклор ансамбльын участницыже (Шернур район):
– Мончалан пуым ситышын ямдыленна. Тылеч посна пакчасаска, емыж-саска гыч шукак шапашленам, поҥгымат ятыр оптенам.
Телым моткоч йӧратем, сандене йӱштӧ деч ом лӱд. Ты пагытыште пӱртӱсат мотор, южшат чапле. Южгунамже тукым ака-шӱжар, иза-шольо-шамыч дене, йочала юарлен, курыкыштат мунчалташ йӧратена.
Серафима ден Станислав АКТУГАНОВМЫТ, Морко район Усурт Вараҥыж ял:
– Телым шокшышто илен лекташ манын, ме кажне ийын латвич кубометр пуым ямдылена. Пуым пӧртыш олташ веле огыл, мончаланат кучылтына. Газ укелан кӧра тудым ямдылыме нерген ондакракак шонаш тӱҥалына.
Пӧртымат шокшемденна, телылан ямде улына.
Эльвира ЗАХАРОВА, Параньга районысо Яҥгетсола тӱвыра пӧрт вуйлатыше:
– Телылан пеш чот ямдылалтына: мӧҥгыштына газ дене илена, а паша верыште, Яҥгетсола клубышто, коҥгаш пу дене олтена. Эше августыштак кум трактор тележке пуым мыланна конден пуэныт. Тудым клуб йыр артанашке оптенна, мотор шыже кече пеш мотор коштен. Коҥгаште шӱчым эрыктенна, кӱмаже йӱлен пытен ыле, угыч оптенна. Ынде коҥгана «мура» веле – олтена, клубым шокшемдаш тыршена. Клубнаже гына пеш тошто, шокшым ок кучо. Сандене кунамже гын куштен-куштен «ырена».
Алевтина БАЙКОВА ямдылен
Авторын да еш альбом гыч налме фото
