18 гыч 24 декабрь марте Москосо ВДНХ-аште эртыше «Россий» всероссийский ончерыште «Йӱштӧ Кугыза-влакын шочмо кечышт» фестиваль эрта.
Элнан тӱрлӧ кундемысе йомакысе тыгай персонаж-влак да нунын полышкалышышт тушко погыненыт. Тӱҥ уремысе сценыште нунын дене палдарат. Варажым кажныже шке калыкшын тӱрлӧ йӱлажым ончыкта, модыш-влакым эртара, толшо-шамычлан пӧлекым кучыкта.
Российыште 18 тӱрлӧ калыкын Йӱштӧ Кугызаже уло: Йӱдвел Осетийысе Артхурон гыч тӱҥалын Якутийысе Чыысхаана марте. Нуно чыланат Москош калык-влакын йӱлаштым да икоян улмыштым ончыкташ чумыргеныт. Икымше кече Великий Устюг гыч тӱҥ Йӱштӧ Кугызалан пӧлеклалтын. Тудак молыштым да полышклышыштым пырля вӱден наҥгаен. Аниматор-влак телын озажын кладшым кычалме модышым эртареныт.
ВДНХ-аште марий Йӱштӧ Кугызан резиденцийжат ВДНХ-аште почылтын. Тудын да уныкажын – Лумӱдырын – рольыштым республикыште эртыше «Йӱштӧ Кугыза деке унала» театрализоватлыме представлений фестиваль-конкурсышто сеҥыше да лауреат лӱмым налше Йошкар-Оласе рӱдӧ паркын актёржо-влак Даниил Пакеев ден Елена Гужавина модыт. Шернур кундемыште эртыше ты фестивальышкыже кандаш район да Йошкар-Ола гыч участник-влак ушненыт.
Республикын Тӱвыра, савыктыш да калык-влакын пашашт шотышто министерствыжын увертарымыж почеш, марий Йӱштӧ Кугыза ден Лумӱдыр дене Москошто 30 декабрьыште да 3-8 январьыште вашлияш лиеш. Лачшымак марий йомак персонаж-влаклан пӧлеклалтше пайремже 23 декабрьыште эртышаш.
С.Носова
Снимкыште: Шернур районышто эртыше конкурс годым.
