Лӱдыкшыдымӧ сай качестван корно
Йӱкым лукшо, шижтарыше
Нацпроект дене келшышын корнышто йӱкым лукшо (шумовой манме) полоса шуко вере ышталтеш. Да сӧраллыклан кӧра огыл, а шижтарыме шот дене.
Тений сезон жапыште регионал да муниципал кӱкшытан корныласе 99 участкыште илемлаш кудал пурымо тура йӱкым лукшо тореш полосалам ыштыме. Молан, шонеда? Нуно кудал эртыме годым чытырналтме йӱкым луктыт да водитель-влакым шекланаш таратат. Адакше волгалтше тӱсыштат тӱткӧ лияш да эркынрак кудалаш кӱлмым шижтарат.
Корнысо тыгай шижтарыше полосаже тӱрлӧ лиеш: торешла – начарын коймо, савырныме але йолешке вончымо верыште; кутышешла – транспорт йогыным шелме тураште.
Корно дене кудалмыда годым нине полосам ик гана веле огыл ужында. Нуно корнышто лӱдыкшӧ улмо да эскераш кӱлмӧ нерген ушештарат.
Юрий ИСАКОВ
Фотом «Марийскавтодор» ГКУ деч налме
