15 мартыште Йошкар-Олаште гармонист ден семӱзгарым шоктышо-влакын «Изи гармончо» регион-влак кӱкшытан конкурсышт лиеш.
Тудым республикысе Марий тӱвыра рӱдер эртара. Тушко семӱзгарым шке гыч, тыгак сымыктыш школлаште шокташ тунемше-влак ушнен кертыт. Конкурсын ойырен налме туржо 11 шагатлан Калык тӱвыра пӧртышто тӱҥалеш гын, сеҥыше-влакын гала-концертышт 16 шагат кастене В.И.Ленин тӱвыра полатыште лиеш. А нуным кум номинацийыште палемдат: сольный йоҥгалтарымаш (гармонь), гармонист-влакын ансамбьльышт да семӱзгарым шоктышо ансамбль (тушто изирак ийготан-влак лийшаш улыт). Эшежым сеҥыше-влакым 8 ий марте, 9 — 10, 11-13, 14-17 ийготан-влак коклаште ойырат. Сольно выступатлыше-влаклан кок номинаций лиеш: гармонь шокташ шке гыч тунемше да профессионал педагогын полшымыж дене.
Кажне участник кок номерым ямдылышаш: конкурслан да гала-концертыште йоҥгалтараш. Йодмашым 5 март марте Марий тӱвыра рӱдерыш колтен шуктыман.
Кодшо ийын эртыше ты конкурсышто гран-прим Пошкырт кундем Амчемучаш школын тунемшыже Иван Петраев сеҥен налын ыле.
Светлана Носова
Снимкыште: И.Петраев
Фотом Калтаса район администрацийын образований пӧлкажын воткыл лаштыкше гыч налме.
