Россий Просвещений министр Сергей Кравцов увертарен: 2027/2028 тунемме идалыкыште 9-ше классым тунем пытарыше-влаклан историй дене устный экзамен обязательный лийшаш.
Россий президентын полышкалышыже Владимир Мединскийын вуйлатымыж почеш историй просвещений ден ведомство-влак кокласе комиссийын заседанийже эртен. Тушто выступленийым ыштымыж годым министр 5-11-ше класс-влаклан да колледж-шамычлан историй дене единый кугыжаныш учебникым ямдылыме шотышто ойлен. Сергей Кравцовын мутшо почеш, 2023 ий гыч тудын дене кугурак класслаште, 2024 ий гыч колледжлаште тунемыт. 2025 ий 1 сентябрь гыч у учебник дене 5-7-ше класслаште пайдаланат, 2026 ий 1 сентябрь гыч 8-9-ше класс-влак тунемаш тӱҥалыт. Тыге тений у тунемме ий гыч Российысе чыла школышто историй дене единый учебник лиеш.
«Россий Президентын кӱштымыж почеш, 2025 ий 1 сентябрь гыч чыла школлаште единый программым пуртымо. Тӱҥ кугыжаныш экзамен деч ончыч 9-ше классыште историй дене устный экзаменым пуртымо нерген пунчалым лукмо. Тиде чыла тунемшылан устный экзамен, тудо январь-апрельыште ГИА-ш пуртымаш формо дене эртаралтеш. Чыла материалым историй дене кугыжаныш учебник-влакын содержанийышт дене пеҥгыдын келшышын ямдылыме лиеш», – каласен ведомство вуйлатыше.
2026-2027 тунемме ийлаште Рособрнадзор дене пырля педагог-влаклан устный экзаменым эртарыме формат дене палдарат. Адакшым у учебник дене пашам ышташ квалификацийым нӧлтымо курсым историйым туныктышо-шамыч тений март мучаште эртат.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
