Шорык
Тиде арнян пайдале ойпидышым ыштеда. Тудо шагал огыл шийвундым кондаш полша. Шкем моло деч кӱшкӧ шындаш ида тырше, уке гын пашам пырля ыштыше йолташда але мӧҥгыштыда лишыл еҥ-влак дене умылыдымаш лектын кертеш.
Презе
Кызыт илышдам вашталташ йӧн лиеш. Тидын дене пайдаланыде кодаш огыл манын, пӱрымашын туштен ойлымыжым, тӱрлӧ палым шотыш налман, «шымше шижмашым» колыштман. Але марте ыштыме йоҥылышым тӧрлаташ келшыше жап.
Йыгыр
Тиде арнян ала-мо шотышто кокытеланымашдам сеҥеда, кӱлешан да пайдале уверым пален налыда. Вуйлатыше ден коллегыда-влак тендан шотышто утыжым поро кумылан огыт лий, чаракымат ыштыл кертыт, сандене тӱткылыкым йомдарыман огыл.
Рак
Тазалыклан лӱдыкшым ыштен кертше сомылым шукташ ида тырше. Ӱшаныдымашым лукшо еҥ-влак дечат тораштырак лийман. Оксам йомдарыме деч шекланыза. Иктаж пашам ыштен огыда керт але огыда шукто манын паледа гын, лучо ида сӧрӧ.
Лев
Тиде арнян лишыл еҥ-влак але паша дене кылдалтше куанле уверым пален налыда. Тыгодым илышыштыда кумылым нӧлтышӧ веле огыл, ойгандарыше событий-влакат лийыт. Аракам йӱмӧ годым шекланыман – аяргыме лӱдыкшӧ уло.
Ӱдыр
Йолташ, лишыл еҥ-влак, шӱмбел дене вашкыл кызыт куандарыше лиеш. Уна-шамычым вашлийын але шкеже унала тарванен кертыда. Тиде арнян пашам шуко ышташ логалеш. Ӱдырамаш-влакын илышыштышт ала-могай чарак лектеш.
Виса
Ушыштыда ойыртемалтше шонымаш шочын кертеш. Ончыкыжым тудо изи огыл лектышыш шуаш полша. Коллегыда-влак коклаште чапда кушкеш, тендам утларак колышташ тӱҥалыт. Мер пашашке чолган ушнаш темлалтеш. Илышыштыда вашталтыш лиеш.
Скорпион
Тиде арнян кӧ дене вашлияш палемденда улмаш, кажныж денат икымше кечылаште ужын мутланыман. Паша верым вашталташ темлат гын, чылажымат сайын вискален налза, вара веле кӧныза але тореш лийза. Тазалыкым эскераш уто огыл.
Пикшызе
Нине кечылаште тыланда шукырак жапым яндар южышто эртараш, спорт дене кылым кучаш темлалтеш. У оҥай еҥ дене палыме лийын але романтике шӱлышан вашлиймашыш миен толын кертыда. Окса арам ынже лий манын, ужалыме-налме дене кылдалтше нимогай ойпидышым ыштыман огыл.
Ирказа
Тыланда кугурак должностьым темлат але пашадарда ешаралтеш манын вученда гын, чыла тиде арам лийын кертеш. Тидлан чаракым ала-могай событий кенета ышта. Туге гынат шыдешкаш огеш темлалт. Шкем кидыште ласкан кучыман.
Вӱд йоктарыше
Кызыт те у еҥ-влак дене палыме лийын, у йолташым муын, молылан шкендам сай велым ончыктен кертыда. Лишыл жаплан планым ышташ келшыше арня. Йолташ-шамыч дене вашлийыда гын, чылажат моткочак веселан да пайдалын эрта.
Кол
Тендан оксада ешаралтеш, у але тошто йолташ дене вашлиймаш куандара. Ала-могай сатум налме кумылдам чот нӧлталеш. Шийвундым ешараш лийме йӧным шонен муыда, да тудо чынже денак шуко оксам конда. Тӱрлӧ пале ден шижтарымашым шотыш налза.
Ӱпым пӱчкаш тарваненда гын
22 январь. Тиде кечын ӱпым пӱчмӧ дене тӱрлӧ уда деч утледа да тазалыкда пеҥгыдемеш. Ӱп тӱс дене экспериментым эртарен кертыда. Натуральный гай койшыш чиялтеда гын, уда шонымашым уш-акылда гыч поктен колтеда, черым «лӱдыктеда».
23 январь. У прическым ышташ темлалтеш, молан манаш гын тыге ӱпда веле огыл саемеш, кумылдат нӧлталтеш. Натуральный гай тӱсыш чиялтеда гын, тазалыкда пеҥгыдемеш.
24 январь. Чот ойыртемалтше прическым ышташ огеш темлалт, уке гын пиал кораҥ кертеш. Ӱпым чиялташ келшыше кече.
25 январь. Таче ӱпым пӱчман огыл. Ӱп тӱсым изишак гына вашталташ лиеш.
26 январь. Тиде кечын ӱпым пӱчмылан кӧра тазалыкда дене нелылык лектын кертеш. Ӱпым шемалге тӱсыш чиялтымеке, кумылда нӧлталтеш.
27 январь. Ӱпым молгунамсе деч чот ойыртемалтшын пӱчкыда гынат, лектышыже куандара. Ӱпым кеч-могай тӱсыш чиялташ келшыше кече. Хна дене пайдаланеда гын, вуйлатыше дене утларак ваш умылаш тӱҥалыда.
28 январь. Таче ӱпым пӱчкыда гынат, огыда гынат лиеш. Тиде илышышкыда нимогай вашталтышымат огеш пурто. Ӱпым чиялташ веле огыл, тыгак кудырташ, ламинироватлаш, моло процедурым эртараш лиеш.
Л.Камалетдинова