Марий Эл Кугыжаныш Погынын индешымше сессийжылан ямдылалтме кышкарыште бюджет ден аграрный комитет-влакын темлыме проектлаштым каҥашеныт.
Депутат-влакым 2024 ийысе республик бюджетын шукталтме радамже дене палдареныт. Ӱмаште бюджетыш 64,7 миллиард теҥге пурен, тыгодымак 61,1 миллиард теҥге роскот ышталтын, профицит 3,7 миллиард теҥге лийын.
Аграрный комитет Мланде отношенийым регулироватлыме нерген законыш темлыме вашталтышлан акым пуэн: муниципал округлаште граждан-влаклан ик черетым ыштыме радам пеҥгыдемдалтеш; мланде участкым яра налме нерген йодмашым кугыжаныш услуго портал гоч пуаш йӧн лиеш.
* * *
Марий Эл Кугыжаныш Погынын аграрный комитетше регионын ялозанлык кумдыклашкыже ӱшанле стационар интернетым пуртымо йодышым ончен.
Цифровой вияҥмаш министр Венедикт Суворовын увертарымыж почеш, республикыштына интернет дене 98,9 процент кумдыкым авалтыме, таче тудо шагал чотан 87 илемыште гына уке.
«Ростелеком» ПАО-н регионысо филиалжын директоржо Светлана Пашукован рашемдымыж почеш, кызыт суртлашке да юридический лица-влаклан интернетым йодмаш почеш пуртат. Тыгодым тиде услугым йодмо чот, интернетым посна кундемыш пуртымо да йодмашым шуктымо йӧн-влак шотыш налалтыт.
Парламентарий-влак республикысе ялозанлык кумдыклашке интернетым пуртымо пашам умбакыжат эскераш кутырен келшеныт.
* * *
Марий Эл Кугыжаныш Погынын социальный комитетше индешымше сессийын паша радамышкыже пурташ темлыме документ-влакын проектыштым ончен.
Комитетын еҥже-влак Марий Элысе ОМС фондын 2024 ийысе бюджетшын шукталмыже да тенийысе бюджетышкыже вашталтышым пуртымо нерген закон-влакын проектыштым сайлан шотленыт.
Фондын директоржо Марина Гурьянован палдарымыж почеш, ӱмаште бюджетын доходшо 12 363,4 миллион теҥге лийын, роскотшо – 12 334,8 миллион теҥге. 2025 ийлан пуртымо вашталтыш бюджет-влак кокласе трансфер, тыгак дефицитым петырыме шке кӧргысӧ оксам – 318,3 миллион теҥгем – ончыкташ кӱлмӧ дене кылдалтын.
* * *
Науко, образований, калыкле да молодёжный политике шотышто комитет ныл проектлан акым пуэн.
Нунын кокла гыч кумытшым Марий Элын Молодёжный парламентше пуртен. Самырык парламентарий-шамыч «Марий Эл Республикыште патриотизм шӱлышеш куштымо нерген» законын мучаш марте ямдылен шуктымо проектшым, тыгак Молодёжный парламент нерген положенийыш вашталтышым пуртымо, МП членын оҥыш пижыктыме знакше нерген пунчал-шамычын проектыштым пуртеныт.
Образований да науко министерствын темлыме законопроектше-влак кокла гыч иктыштыже самырык педагогын паша гыч ышташ кӱлмӧ вич ий деч ончыч кайымыж годым пособийым пӧртылтымӧ радамым рашемдыме. Тиде жап пособийым налме кече гыч шотлалташ тӱҥалеш.
Маргарита Иванова.
Марий Эл Кугыжаныш Погынын фотожо.
