Тений Марий Элыште индеш школым капитально олмыктат.
Школ, йочасад да кыдалаш профессионал образованийым пуышо тунемме верлам уэмдыме дене кылдалтше йодыш-влакым «Единый Россий» партийын генеральный советшын секретарьже Владимир Якушевын вуйлатымыж почеш видеоконференций йӧн дене эртыше заседанийыштыже каҥашеныт. Тушто республикнам вуйлатыше Юрий Зайцев палемден: йоча-влаклан образованийым да воспитанийым пуаш кажне тунемме верыште кызытсе жаплан келшыше йӧным ыштыме шотышто республикыштына кӱлеш паша шукталтеш, тидлан Марий Эл правительстве мутым куча. Тений Шернур, Кужэҥер, Марий Турек, Курыкмарий, Медведево районласе, тыгак Йошкар-Ола ден Волжск олалаште индеш общеобразовательный организацийыште 10 зданийым капитально олмыктат. Тидлан ик миллиард утла теҥгем ойырымо, тышеч 995 миллионжо — федерал бюджет гыч.
«Ешлан полышым пуымаш» федерал проект почеш республикысе кок йочасад уэмдалтеш. Тиде Марий Турек район Косолоп селасе «Ромашка» ден Волжск оласе 3-шо №-ан «Орлёнок» йочасад-влак. Олмыктымо пашалан чумыр налмаште 128 миллион теҥге ойыралтын.
Школ ден йочасадлаште капитально олмыктымо паша тений 1 август марте мучашлалтшаш.
«Молодёжь да йоча-влак» нацпроект почеш «Профессионалитет» регионысо проект кышкарыште колледжлаште тунемме корпус ден тӱшкагудо-влакым уэмдыме паша ышталтеш. Тидлан 310 миллион теҥге ойыралтын.
Палемдыме проект почеш 2025-2027 ийлаште Йошкар-Оласе 9А микрорайонышто у школым чоҥаш палемдыме. Подрядный организаций контрактым шукташ тӱҥалын: объектым ышташ кумдык ямде, кызыт свайым вераҥдат.
Марий Эл Республикым вуйлатышын пресс-службыжын уверже негызеш Галина Кожевникова ямдылен.
