– Мый Майя Тимофеевна Романова дене пеш келшена ыле. Озаҥ олашке илаш куснымекем, ик ийын шокшо кеҥеж кечын Йошкар-Олаш толмекем, тудын дене вашлийна. «Аля, тыйже каенат да олажат пустаҥын! Молан каенат? Кунам толат?» – манеш. А мыйым илыш йогын виян корно дене наҥгаен, Юмо мыйым шкеж деке савыралын, Сергей Чавайнын коштмо духовный семинарийыште тунемынам, – ойла Аля Мокеева.
Кужэҥер район Чашкаялыште шочын-кушшо Алевтина Мокееван лӱмжӧ шукылан палыме. Кодшо курымын 70-ше ийлаштыже ойыртемалтше поэзийже дене марий сылнымутын омсажым почын. Почеламутшо-влак икмыняр автор дене пырля лукмо «Чон корштымо муро» книгаште лектын. Кенета… йомын: поэзий йӱкшат, шкежат. Но тӱняште илыше айдеме шудо каванеш йомшо име огыл, теве шыже вашеш Алевтина редакцийышкына тольо, ятыр у почеламутшым кондыш. Таче ме сылнымутчын тӱняумылымашыже, ончалтышыже, шонкалымашыже дене палымым ыштена.
Айдеме шочеш – ошма шагат шындалтеш: ик ошма пырче йога, весе, кумшо… Юмо айдемым тӱняшке заданий дене колта, ӱшанжым шукта але уке – эскера. Ошма изи-и-ишак кодмек, суксыжым колта, а тудо чонетлан ойла: «Айда погыно, тыйын жапет шуын». Иктаж-кӧжӧ колымо годым южышт миллион пачаш шортыт, шортман огыл, тудын мланде ӱмбалысе жапше эртен, тудым Юмо налын. Тӱняште шочшо айдеме иктат колдымо уке. Тышкыже толыт да нуно огыт пале, молан илат: икте-весыштым тошкат, шӱктарат, пызырат, илаш йӧным огыт пу. Кунам оксалан возымо жап лийын, писатель, поэт-влак икте-весыштым кочкын иленыт, ваш-ваш пытареныт.«Кугарня» газет редакцийыште ыштымем годым «Марий Эл» газетыш сылнымут редакторлан Галютин тольо. Ойла: «Ия марте толын пытеныт! Ия марте возат!». Мыйже манам: «Юрий Иванович, чылаштым печатлыза, чылаштым – историй шке ойырен налеш». Кызыт оксалан гына возышо уке, тугай айдеме-шамыч каен пытеныт.
Тичмаш материалым 2021 ий 7 декабрьыште лекше «Марий Эл» газетыште лудса.
