Звенигово олаште илыше Валентина Пинаева 23 октябрьыште 100 ийым темен.
Лӱмгече оза Марий Турек районысо Ошлан почиҥгаште шочын. Йоча жапше коллективизаций да яллаште совет кучемым вияҥдыме годым эртен, самырык пагытше – Кугу Ачамланде сар ийлаште.
Валентина Михайловна районысо администрацийыште 25 ий машинисткылан тыршен, вара «Знамя» газет редакцийыште 16 ий ыштен. 1949 ийыште Виктор Пинаевлан марлан лектын. Ешыште кум эрге: Александр, Евгений да Юрий – шочын. Вате-марий Пинаевмыт нуным сайын ончен куштеныт, туныктен луктыныт, йол ӱмбак шогалтеныт.
Кызыт Валентина Михайловна Звенигово олаште Александр эргыж дене ила. Вачӱмбакыже кугу ийготым пыштен гынат, шкенжым чулымын куча, илышым моткоч йӧрата да ключвордым кумылын решатла.
Тылын труженикше, пашан ветеранже Валентина Пинаева эн тӱҥ поянлыкшылан ешыжым шотла. Таче тудын 3 йочаже, 5 уныкаже, уныкаже-шамычын 9 шочшышт да 2 кугезе уныкаже улыт.
Фото: Z/ Иванова М.П./ Валентина
***
Тыгаяк курымаш лӱмгечым 26 октябрьыште Параньга район гыч тылын труженикше, пашан ветеранже Рашида Фазлиахметова палемден.
Пӧртанур ялыште шочшо ӱдыр 12 ияшак ача деч посна кодын. Ешыште эн кугу йоча лийын, сандене изинек пӧръеҥ пашам ышташыже логалын.
Кугу Ачамланде сар тӱҥалмеке, Кемеровский областьыш каен, тусо ик заводын мозаичный цехыштыже тыршен.
Мӧҥгыжӧ 1947 ийыште пӧртылын да икмыняр жап гыч Морко районысо Петровский селасе чодыра комбинатыш пашам ышташ каен. Тыште тудо 30 ий пушеҥге укшым руэн. Сай показательым ончыктымыжлан Марий АССР Чодыра озанлык министерстве тӱрлӧ награде да юбилейный медаль дене ик гана веле огыл палемден.
Неле пашам ыштымыжлан кӧра сулен налме канышыш 50 ияш лектын да шочмо ялышкыже пӧртылын. Марлан лектын огыл, сандене эн ӱшанле эҥертышыжлан социальный пашаеҥым полша.
Маргарита ИВАНОВА.
Марий Элын Паша да социальный аралтыш министерствыжын пресс-службыжын фотожо.
