Марий Элыште илыме пӧрт-влакым веле огыл, пырля йоча да спорт площадкылам, социальный, инженерный да транспорт инфраструктурыш пурышо объект-влакым чоҥаш тӱҥалыт. Тыгай паша кумдыкым комплексно вияҥдыме (КРТ) нерген ойпидышын условийже дене келшышын шукталтеш.
КРТ проект-влакым илышыш шыҥдарыме шотышто ДОМ.РФ эртарыме кок аукцион почеш Марий Элыште 300 тӱжем кв.м. илыме вер чоҥалтшаш. Тидын нерген республикын правительствыжын председательжын алмаштышыже Александр Сальниковын вуйлатымыж почеш эртарыме совещанийыште пале лийын. Совещанийыш регионысо застройщик-влак да илыме вер сферым вияҥдыме Институтын еҥже-влак ушненыт.
Проект-влак, КРТ-ын стандартше-влакым кучылтын (нуным ДОМ.РФ пеҥгыдемда), 10,5 ий жапыште шукталтшаш улыт, тыгак шуко пачеран илыме верым чоҥымо годым «ужар» манме стандартымат эскерышаш улыт. Ты стандартше 2022 ий ноябрь гыч кучылталтеш.
«ДОМ.РФ дене пырля ыштыме паша кугу лектышым пуа, вет граждан-влак илыме веран лийыт, чоҥымо пачерын качествыже саемеш, рӱдолана да моло ола сылнештыт. Лач тидыжак республик правительствын решатлышаш задачыжлан шотлалтеш. Марий Элыште инфраструктур проект-влак илышыш шыҥдаралтыт, илыме микрорайонла шарлат. Тидын годым теве мо пеш кӱлешаным шотыш налман: шуко пачеран пӧртым нӧлтымӧ жапыштак воктене школ, йочасад, поликлинике-влакым чоҥыман. Кумдыкым комплексно вияҥдымашын механизмже калыклан йӧнан условийым ыштымашке виктаралтын», – каласен Марий Эл правительстве председательын алмаштышыже Александр Сальников.
Инвестор-влаклан Йошкар-Ола тӱрыштӧ кок участке темлалтеш, иктыжын кумдыкшо – 23,4 га, весыжын – 22,2 га. Нуно рӱдола деч 5,5 меҥге ӧрдыжтӧ, Мышино ял воктене верланеныт. Тиде кумдыкышто 150 тӱжем кв.м. илыме верым чоҥаш лиеш. Площадке-влак шотышто торг 9 июньышто лиеш.
Аукционыш ушнаш йодмаш 5 июнь марте налалтеш. КРТ нерген ойпидыш-влакын тӱҥалтыш акышт тыгай: икымше участкын (23,4 га) – 9,87 миллион теҥге, кокымшо участкын (22,2 га) – 9,89 миллион теҥге.
«2921 ий мучаште эртарыме икымше торг почеш кызыт у микрорайон-влак чоҥалтыт. Аукцион застройщик-влаклан проектым писынрак тӱҥалаш йӧным пуа. Тыгай лектыш уло, регионлаште у илыме вер комплекс-влак инфраструктур да оласе йӧнан среда дене иквереш чоҥалтыт. Тидыже еҥ-влакын илышыштым саемдаш полша», – палемден ДОМ.РФ «Реализация федерального имущества» подразделенийын директоржо Николай Сарокваша.
ДОМ.РФ специалист-влак совещанийыш чумыргышо-влакым аукционын правилже дене палдареныт, ончыкылык стройплощадкылам ончен савырненыт, илыме вер сферым да чоҥымо отрасльым вияҥдыме шотышто проект-влакым шыҥдарыме годым моло финанс йӧным кучылтмо нерген каласкаленыт.
Марий Эл Республикым вуйлатышын администрацийжын информаций паша шотышто пӧлкажын уверже негызеш
Л.СЕМЕНОВА ямдылен
