Йошкар-Оласе технологий колледжын студенткыже-влак самырык дизайнер-влаклан Озаҥыште эртыше «Шыжымсе стиль» Россий кӱкшытан конкурсышто I верым сеҥен налыныт.
Тушто элнан тӱрлӧ субъектше гыч автор-влакын 30 утла коллекций ончыкталтын. Мемнан ӱдыр-влак жюрилан аклаш «Street Styl» («Уремысе стиль») номинацийыште «Метаморфоза» пашаштым темленыт. Капсул коллекций спорт-шик стиль почеш ышталтын, кажне модельже шуко лончан да икмыняр изделий гыч, нуныжым тӱрлӧ семын ушаш да тыгодым у образым шочыкташ лиеш.
Тыгай коллекцийым ямдылыше-влакын мутышт почеш, конкурс моштымашым ончыкташ йӧным ыштен, тыге вият ешаралтеш да ойырымо профессийлан эшеат сайын тунемаш кумыл лектеш.
Г.Кожевникова
Снимкыште: Йошкар-Оласе технологий колледжым вуйлатыше А.Ванюшин конкурсышто сеҥыше студентке-влак дене пырля; ӱдыр-шамычын «Метаморфоза» коллекцийышт гыч паша.
Фотом Марий Эл Образований да науко министерстве гыч налме.
