Таче – Шинчымаш кече. Икымше гана школыш кайыме, парт коклаш шичме кажнын ушышкыжо поро шарнымашым коден. Шарнем, мыят моторын чиктен, кужу ӱпышкем ош бантым пижыктен, ваче гоч портфельым сакалтен, авам дене кидым кучен школыш ошкылынам. Очыни, тиде кечын эн пиалан ӱдыр лийынам, вет мыйынат акам да изам семын тунемше лиймем шуын!
А те, йолташ-влак, тиде жапым шарнеда?
Арсений ЯЙЦОВ, Россий культурын сулло пашаеҥже, гармоньчо:
– Икымше классыш 1961 ийыште Курыкмарий районысо Йынгы Парнингӓш школыш каенам. Авам чаткан чиктен колтен. Классыште пырля тунемме йолташ-влак кокла гыч Виталий Таюков дене поснак чот келшенна, кеч-кушкат пырля коштынна, урок деч вара модынна. Икымше туныктышем – Нина Фёдоровна Ширяева. Тудо пеҥгыдын йодшо лийын, но тыгодымак поро кумылан улмыж дене кажне тунемшын кумылжым налын моштен. Тудын пелашыже, Герман Герасимович Ширяев, кумшо классыште тунеммем годым гармоньым шокташ туныктен. Садлан нунылан ӱмырем мучко тауштен илем.
Лариса ПЕТРОВА, Марий Эл культурын сулло пашаеҥже:
–1974 ийыште Волжский районысо Эҥерӱмбал школыш нулевой классыш каенам. Тиде кечым чотак вученам: лудаш, возаш моткоч тунемме шуын. 1 Сентябрьыште Валентина Чузаева йолташ ӱдырем дене партым ойырен налаш манын, ондакырак миенна. Классыштына 22 тунемше лийынна. А икымше классыш Йошкар-Оласе 1-ше номеран музыкально-художественный интернат-школыш толынам. Туге гынат нулевой классыште тунемше-влак жапын-жапын вашлиймашым эртарена.
Жанна СМИРНОВА, Оршанке районысо Кугунур тӱвыра пӧрт вуйлатыше:
– 1982 ийыште Тошто Крешын школыш икымше классыш каенам. Шарнем, у мотор формым, кугу ош бантым авам налын, гладиолус аршашым лӱмынак поген пуртен. Туныктышына Зинаида Павловна Москвичева поро, шыма шомак дене мемнам классыш ӱжын. Ме изишак ӧрын, вожылын парт коклаш шинчынна. Классыштына латкокытын лийынна. Школыш моткочак кайымем шуын. Икымше урокышто, азбука книгам кидыш налын, буквам лудаш тӧчымым, а вара шотлаш тунеммым кызытат сайын шарнем. Тидлан ятыр ий эртен гынат, икымше туныктышынан поро кумылан, эреак полшаш умде улмыжо чоным ырыкта. Ме, пырля тунемше-влак, тудлан вуйнам савена!
Кристина ЛЕБЕДЕВА, М.Шкетан лӱмеш Марий национальный драме театрын артистше:
– 1999 ийыште Морко районысо Изи Ярамарий школыш каенам. Икымше гана парт коклаш шичмым икымше ошкылым ыштыме семынак кужу жап шарнаш тӱҥалам. Эрдене кынелын, авам ош бантым вуйыш пижыктен, пеледыш аршашым поген пуртен. Чонышто куан кумыл лийын гынат, класс омсам почын пураш моткоч тургыжланенам.
А.БАЙКОВА
Фотом еш альбом гыч налме
