Красноярскыште «Азия Сибирь-2024» наций-влак кокласе моторлык да талант XVIII конкурс эртен.
Тушто марий ӱдыр икымше гана шке усталыкшым ончытен. Тиде – Татарстанысе марий-влакын калыкле-тӱвыра автономийыштын самырык-влакын организацийыштын ончылъеҥже Юлия Аксюбина. Ӱдыр финалыш лектын, а туштыжо 12 ӱдыр таҥасен. Конкурсын условийже почеш, кажне участнице шке калыкшын ойыртемалтше тӱвыраже дене палдарышаш, усталыкшым ончыктышаш улмаш. Санденак конкурс моткоч ойртемалтше лийын. Тений тудо Еш идалыклан пӧлеклалтын. Тыгак кажне ӱдыр шке калыкшын сӱан йӱлажым ончыктен, модель семын национальный вургемым чиен сценыште коштын. Юлия марий вургем дене марий койышым ончыктен, кӱслемат шоктен.
Ӱдыр Озаҥ консерваторийым тунем пытарен. Икмыняр гана марий музыкальный тӱвыра нерген Россий да тӱнямбал кӱкшытан конференцийлаште выступатлен. Озаҥыште эртыше специальный олимпиадын волонтержат лийын. Тыгак Татарстанысе калык-влакын молодёжный ассамблейжын советыштыже шога. Спорт денат кылым куча, боксышто шкенжым терга.
Светлана Носова
Снимкыште: Юлия Аксюбина конкурс годым.
Фотом Татарстанысе марий-влакын автономийыштын воткыл лаштыкше гыч налме.
