Республикыште у сайлымаш кампаний пагыт тӱҥалеш.
Йошкар-Олаште сайлымашым мер эскерымаш штабын икымше заседанийже лийын. Тудо Марий Эл Мер палате пелен пашам ышта.
Штабын составше тений уэмын. Тушко мер палатын членже, чолга еҥ-влак да СМИ пашаеҥ-влак пуреныт.
Заседанийыште Мер палате вуйлатышын алмаштышыже Роман Золотухин штабын пашажын кӱлешан улмыжым палемден. Тений федерал да республик кӱкшытан сайлымаш огеш лий гынат, регионысо 10 % утла сайлыше муниципал кампанийлашке ушна.
Погынышо-влакын темлымышт почеш Штаб вуйлатышылан Марий Элын Мер палатыжын еҥже Евгений Кузнецовым сайленыт.
– Республикыште илыше-влак 14 сентябрьыште 54 депутатым сайлат. Шке пашаштына ме «Независимый общественный мониторинг» ассоциацийын стандартше-влаклан эҥертена, – палемден Евгений Иванович.
Марий Элыште сайлымаш 2 кече, 13 да 14 сентябрьыште, эрта.
Йошкар-Олаште ешартыш сайлымаш лиеш (1 мандат);
Волжскышто – уэш сайлымаш (1 мандат);
Руэмыште – уэш сайлымаш (1 мандат);
Кужэҥерыште ешартыш сайлымаш лиеш (2 мандат).
Муниципал реформым эртарыме дене у депатут корпус-влак нине муниципал округлаште ышталтыт:
Волжский МО – 16 мандат;
У Торъял МО – 16 мандат;
Шернур МО – 17 мандат.
Чыла 7 ТИК-ыш да 68 УИК-ыш видеокамерым вераҥдат.
Любовь Камалетдинова
Михаил Скобелевын фотожо.
