Тиде кечылаште Марий Элыш «Рувики» редакцийын пашаеҥже-шамыч толын коштыныт. Нуно икмыняр вашлиймашым эртареныт.
Тӱҥалтыште Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов дене вашлийыныт. «Рувики» интернет-энциклопедийым вияҥдыме шотышто директор Вячеслав Умановский, тӱҥ редакторын алмаштышыже Рустам Гатауллин, Российыште илыше калык-влакын йылмылашт дене пашам ыштыме шотышто пӧлкам вуйлатыше Андрей Чемышев республикнан элысе у интернет-платформыж дене пеҥгыде кылым ыштыме нерген мутланеныт. Мутлан, тӱрлӧ сотемдарыме акцийым, «Рувикиш» статьям возымо дене кылдалтше мастер-классым республикыштына эртараш мутланен келшеныт.
Константин Анатольевич республикнан Тӱвыра, савыктыш да калык-влакын пашашт шотышто министерствыже марий йылмым цифровизироватлыме паша план почеш эрта манын пеҥгыдемден каласен. С.Г.Чавайн лӱмеш национальный книгагудын пашаеҥже-влак Марий Элын электрон книгагудыжым ямдылат. Тачысе кечылан книгагудын фондыштыжо улшо XVIII курым гыч тӱҥалын 1941 ийыште савыкталтше книга-шамычым цифровизироватленыт. Тыгак Common Voice платформышто марий йылмым умылышо датасетым чумырымо паша умбакыже шуйна. Кызыт марий йылме дене предложенийым йӱкаҥдыме жап 300 шагатыш шуын. МарНИИЯЛИ-н шанче пашаеҥже-влак марий йылме корпусым чумыреныт.
9 октябрьыште министерствыште «Рувики» интернет-энциклопедийын пашажлан пӧлеклалтше пресс-конференций эртен. Тушто журналист-шамычлан онлайн-энциклопедийын вияҥмыж нерген радамлын каласкаленыт.
Таче кечылан энциклопедийыште статья-влакым 21 йылме дене лудаш йӧн уло. Ты проектым пашаш колтымо годым (2023 ий, 24 июнь) тушто 1,9 миллион статьям вераҥдыме улмаш. Нуно руш йылме дене гына возымо лийыныт. Марла йылме дене версий ӱмаште ноябрьыште лектын. Курыкмарла пӧлка – тений августышто. Онлайн-энциклопедийыште марий йылмына дене 26 тӱжем статья уло. Таче кечын сайтын аудиторийже 3,8 миллион еҥыш шуын. Шукерте огыл тудым уэмдыме. Ынде онлайн-энциклопедийыште уверым Yandex GPT нейросеть полшымо денат пален налаш лиеш.
Специалист-влак тыгак ты интернет-энциклопедийым марий йылме дене возымо статья-влак дене пойдарыме йодыш шотышто мастер-класс эртареныт. Тушто погынышо-влаклан ты энциклопедийыште регистрацийым эртен, тушко шке статьям тӧрлымӧ, фото ден видеом кузерак вераҥдыме нерген каласкаленыт.
Лидия ШАБДАРОВА
Михаил Скобелевын фотожо
