КУЛЬТУР ДА ИСКУССТВО СЫМЫКТЫШ ТЕАТР

«ИК ЯЛЫШТЕ КУМ СӰАН» але «Ик Эчуклан кум Салика»

Автор Геннадий Гордеев пьесым «Ик Эчуклан кум Салика» вуймут дене возаш тӱҥалын. Пашажым мучашлен шуктымеке да икмыняр жап гыч тудым театр сценылан ямдылаш тӱҥалаш мут лекмеке, пьесын шонымашыжым почын пуышо утларак чын вашмутым муын: «Ик ялыште кум сӱан».

Тидын нерген пьесын авторжо тыгерак вашештыш:

«Салика» – марий калыкын ик эн йӧратыме спектакльже. Тудо Шкетан лӱмеш Марий национальный драме театрын репертуарыштыже шукертсекак. Арам огыл ты постановко марий калыкын шӧртньӧ фондшылан шотлалтеш. Тыгак эше прозаик Александр Петров «Саликан пиалже» романыштыже спектакльысе тӱҥ герой-влакын илыш корныштым умбакыже шуя. Садлан возен шуктымо пьесын вуймутшым Салика да Эчук лӱм дене кылдаш шым тӱҥал. Адакшым пьесын идейже Салика да Эчук огытыл, а мемнан тачысе илышна, тачысе самырык тукымнан икте-весе кокласе кыл ойыртемышт. А «Салика»  – тиде улыжат  спектакльын фонжо.  Спектакльын премьерже Марий самырык театрыште 26 январьыште лиеш.

Пьесым автор кок ий ончыч пандемий тӱҥалме жапыште возен.

– Тунам йырна илыш шӱлык тӱсым налмеке, пьесыште тачысе илышлан келшен толшо темым мыскара, воштылчык, муро-куштымаш гочын почын пуаш тыршенам. Тӱҥ темыжлан теве мом шотлыман: ӱдыр-влак поян качым кычалыт да пижынак манме гай тудлан марлан лекташ тыршат. Мутат уке, тыгай сӱрет кугу олалаште поснак сайын палдырна. Произведенийыштем ялысе самырык каче Йыгнат икмыняр каныме базым куча. Весела, шинчалан перныше рвезе чапле автомашина дене кудалыштеш. Тудо ӱдыр-влакым йӧрата, адакшым ӱдыр-влакат поян качетым руалташ шонат. А «Саликаште» мӧҥгешла – Салика поян каче дечын шылын куржеш.

– «Ик ялыште кум сӱан» спектакльыште действий умбакыже кузе савырна?

– Тыгодым кенета ялысе медпунктыш у медшӱжар толын лектеш… Йыгнат тудым молыгунамсыла моло ӱдыр-влакым йӧратымыла ик ужмаште йӧратен шында. Но Оля… тудын дене палыме лияш тореш улеш, эсогыл Йыгнатын лӱмет кузе манын йодмыланат, мыскара йӧре «Салика улам» манын воштыл вашешта. Тыгай вашмут Йыгнатым ылыжтара веле: «Тый – Салика, а мый тугеже – Эчук!» Тыге Йыгнатын кумылжо почеш ялысе клубышто «Салика» спектакльын репетицийже тӱҥалеш. Тӱҥ герой Эчукым Игнат модеш гын, Саликан рольышто –  кызыт гына ялыш медшӱжарлан толшо Оля, – пьесын содержанийжым кӱчыкынрак каласкалаш тӱҥале Геннадий Филимонович да иканаште шомакшым кӱрльӧ да ешарыш. – А умбакыже сӱрет кузе савырна – сценыште ужына.

МАТЕРИАЛЫМ ТИЧМАШНЕК «МАРИЙ ЭЛ» ГАЗЕТЫШТЕ ЛУДАШ ТЕМЛЕНА!

Опубликовать в Одноклассники

Добавить комментарий